Т.Молдағалиев атындағы аудандық мәдениет үйінің қарамағындағы жастар драма театры тұңғыш қойылымының тұсауы кесілді. Аталған театр көрнекті орыс драматургы А.Володиннің «Қоштасқым келмейді…» драмасын көрермен назарына ұсынды.
Көрнекті орыс драматургы А.Володиннің терең психологиямен ерекшеленетін пьесасына ажырасуға бел буған сегіз отбасының тағдыры арқау болады. Жасы, әлеуметтік мәртебесі, дүниетанымы жағынан әртүрлі бірнеше шаңырақ иелері сан түрлі өмір драмасына ұшырап, күмән-күдікке, тәкаппарлыққа бой алдырады – бақытты кездесулер баянсыз қоштасуларға ұласқалы тұр. Некелерін бұзуға сотқа келген оларды татуластырмаққа судья барын салады. Алайда өзімшіл ерлі-зайыптылар бір-бірін тыңдаудан, түсінуден қалған.
Қойылымда әр кейіпкер әртүрлі танымын, жеке дүниетанымын алға тартады. Әрбір кейіпкер, яғни әрбір адам – жеке әлем, тек сол әлемге үңілу, оны түсіне, қажет болса кешіре білу – үлкен қасиет. Негізінен театрдың жас буыны қатысатын спектакль өмірдің осы бір қарапайым да күрделі пәлсапасы туралы ойларға жетелейді. Адам баласының асыл сезімі мен отбасы құндылығын сақтауға үндейді. Ауданымызда алғаш қойылған «Қоштасқым келмейді…» драмасында Саят Жапарқанов, Айсұлу Елубай, Меруерт Оразалин, Аяулым Сәрсенәлі, Дильназ Ташмұхамед, Сания Басабаева, Бақытгүл Исмаил, Гүлнұр Құрмаш, Молшылық Медет, Рахат Әлқожа, Әсел Салық, Ернар Мұқан сынды жас таланттар түрлі рөлдерді сомдады. Жақсылық Тұрлығазы режиссерлық еткен қойылымды көрермен жылы қабылдап, әлсін-әлі қол соғып отырды. Сахна шымылдығы жабылар сәтте де жиналған жұрт жастар драма театры ұжымына ұзақ қол соқты. А.Володиннің «Қоштасқым келмейді…» драмасын аударған және сахналайтын қоюшы-режиссер – ҚР еңбек сіңірген қайраткері Асхат Маемиров. Бұл қойылым елімізде алғаш рет М.Әуезов атындағы Қазақ мемлекеттік академиялық драма театрында сахналанған болатын.
Е.АСЫЛ.
