«Нұр Отан» партиясының «Ардагерлерді ардақтайық» партиялық жобасын жүзеге асыру мақсатында партияның аудандық филиалында   

аудан әкімдігінің ішкі саясат  бөлімі, жұмыспен қамту және әлеуметтік бағдарламалар бөлімі,  аудандық қорғаныс істері жөніндегі бөлім, аудандық аурухана, аудандық «Атамекен» кәсіпкерлер палатасының басшылары  бас қосып, өзара меморандумға қол қойды.

«Ардагерлерді ардақтайық» партиялық жобасын бірлесіп жүзеге асыру шеңберіндегі өзара іс-қимыл және ынтымақтастық туралы меморандумды жасау-дағы мақсат – Ұлы Отан соғысының қатысушылары мен мүгедектерінің, тыл еңбеккерле-рінің және  63 жастан асқан адамдардың өмір сүру сапасын арттыруға бағытталған бірлескен және келісілген  іс-қимылдарды жүзеге асыру мәселелері бойынша  өзара қолдау көрсету болып табылады.

Кездесуді ашқан партияның аудандық филиалы төрағасының бірінші орынбасары Қуат Сұлтанұлы:

– Ардагерлерге барынша қолдау көрсету, жастарды қарт кісілерді құрметтеуге, сыйлауға үйрету – біздің міндетіміз. Партия қашан да мұндай азаматтарға көңіл аударып, проблемаларын шешуге барынша атсалысып келеді. Ауданымызда қазіргі таңда 14 Ұлы Отан соғысының ардагері бар.  Қолдан келгенше оларға қамқорлық көрсетіп, патриоттық, отансүйгіштік туралы ойларын аудио, видео таспаларға жазып алып, болашақта жас ұрпаққа үлгі-өнеге ретінде көрсету үшін сақтап қоюымыз қажет. Сонымен қатар, ауданымызда 52 жалғызбасты қарт адам қамқорлыққа алынып, үнемі біздің назарымызда. Бұл кісілердің қысқы отын-суына көмектесуіміз керек. Еңбек ұжымдарына хат жолдап, бұрын сол ұжымда қызмет еткен, қазіргі таңда жалғызбасты  болып отырған азаматтарға көмек беруге шақырамыз, – деп атап өтті.

Жиынға қатысушы өзге азаматтар бұл пікірді қолдап, өз тараптарынан ардагерлерге жасалатын қамқорлықтар туралы ойларымен бөлісті.

Нұрбану КАМАЛ.