«Тілі бар халық – халық, тілі жоқ халық – балық». Бұл әфсананы Шерхан Мұртаза сынды халқымыздың тау тұлғасы айтқан. Рас, тіл – халықтың халық болуында ойып орын алатын алғышарттың бірі. Тілден барып салт-дәстүр, дін, болмыс сынды құндылықтар құрала береді. Тілсіз мұның бірі де жоқ.
Жақында Ұлтық ұланның Қаракемер кентіндегі 6654 әскери бөлімінде «Менің тілім – мемлекеттік тіл» атты байқау ұйымдастырылды. Байқау өзге ұлт өкілдері арасында өтті. Себебі, әскери бөлім қазақ халқының дархан даласы сынды көпұлтты. Өзге ұлт өкілдері ортақ Ота-нымызды қорғау мүддесін өзге түсініктерден жоғары қойған жандар, әрі қазақ халқының тіл мен салт-дәстүрін жетік меңгерген. Мұны байқау талаптарын сүрінбей орындаған олардың алғырлығынан аңғардық. Байқау талаптарына сәйкес қатысушылардың қазақ тілінде сөйлеу мәнері, ән шырқау, салт-дәстүрді жетік білуі, тарихи тұлғалар туралы баяндама жасай алуы сыналды. Әр кезең жіті талқыланып, әділ-қазылар алқасы қатысушыларға әділ-баға берді. Домбырамен ән шырқап көрерменді тәнті еткен кіші сержант Алексей Мешков, «Бауыржан Момышұлы» фильмінен ана тілімізде үзінді келтіріп батыр Баукеңді сомдаған сержант Дмитрий Шумаров әділ-қазылар және көрермендер тарапынан зор қошеметке ие болды. Сайыс барысында әскери бөлімнің сарбаздар құрамы ән шырқап кешті кереметтей мерекеге ұластырды. Ана мен әкеге деген сағыныш, әрбір орындалған ән ырғағынан сезілсе, Отан, жауынгерлік рух та сондайлық кеңінен шырқалды. Алматы облыстық «Тіл» оқу-әдістемелік орталығының Еңбекшіқазақ ауданы бойынша филиалының оқытушысы Динара Қоқанова, әскери оркестр басшысы капитан Рамиль Баширов, Қаракемер ауылдық мәдениет үйінің кітапханашысы Бекзат Бақытжанқызы, Әскери бөлімнің тәрбие және әлеуметтік құқықтық жұмыстар жөніндегі бөлімшесі басшысының мемлекеттік тілді енгізу жө-ніндегі аға көмекшісі кіші сержант Перизат Алпысбаева қатысушыларға сын-ескертпелерін айтып жалпы жақсы деген бағасын берді. Дегенмен, бұдан әрі де талаптана түсу қажеттігін ескертті.
Сайыс нәтижесінде 1-ші орынға сержант Дмитрий Шумаров ие болды. 2-ші орынға кіші сержант Алексей Мешков лайық деп танылды. 3-ші орын сержант Сергей Бауэрге бұйырды. Олар арнайы алғыс хат және сыйлықтармен марапатталды.
Әділет САРЫБАЙ,
Қаракемер кенті, 6654 әскери бөлімі,
кіші сержант.
