Жуырда Бөлек ауылдық округінде өткен әкім сайлауының қорытындысы мәлім болып, жеңіске жеткен кандидат арнайы түрде тағайындалды.
Аудандық сайлау комиссиясының төрағасы Бақыт Жексембиевтің мәліметіне сүйенсек, аталған өңірде сайлаушылар тізіміне 5244 азамат енгізілген, олардың 3049-ы дауыс беруге қатысқан, жарамсыз бюллетендер саны 26 болса, «Бәріне қарсымын» деген жолда – 209 адам болған.
3 кандидаттың арасынан 2503 (88,95%) дауыс жинап, айқын басымдықпен жеңіске жеткен Асыл Изиевке Бақыт Есенханұлы Бөлек ауылдық округінің әкімі екенін растайтын куәлік табыстады.
Тағайындау рәсіміне қатысқан ауыл ақсақалдары мен тұрғындары, мектеп, балабақша басшылары осы күнге дейін де бірнеше жыл бойы Бөлек ауылдық округінің әкімі болып келген Асыл Серікұлының атқарған қызметі мен жақсы қырларына тоқталып, ақ тілектерін білдірді.
Аудан әкімі Алтай Досумбаев пен аудандық мәслихат хатшысы Бекет Ахметов те өз кезектерінде Бөлек өңіріндегі атқарылған және жоспарда бар жұмыстарға кеңінен тоқталды. Шара соңында аудан әкімі Асыл Изиевті қызмет орнына салтанатты түрде жайғастырды.
