Ават ауылдық округінде де әкім сайлауы өткен болатын. Сайлау комиссиясының мәліметінше аталған округте сайлаушылар тізіміне 3852 азамат енгізілген. Олардың 1061-і дауыс беруге қатысқан, жарамсыз бюллетендер саны 25 болса, «Бәріне қарсымын» деген жолды таңдаған 2 адам болған.
5 адам әкім болуға үміткер деп танылған. Сайлау нәтижесі бойынша ұзақ жылдар бойы аудандық ішкі саясат бөлімінің басшысы болған, бертін келе «Ішкі саясат, мәдениет, тілдерді дамыту және спорт» бөлімі басшысының орынбасары қызметінде болған Момунжан Исламов 447 (43,23%) дауыспен жеңіске жеткен еді.
Тағайындау рәсімінде сайлау қорытындысын баяндаған Бақыт Жексенбиев Момунжан Исламовқа Ават ауылдық округінің әкімі екенін растайтын куәлік табыстады.
Ауыл ақсақалдары жаңадан сайланған әкімге бата-тілектерін білдіріп, қызметіне сәттілік тіледі. Аудандық мәслихат хатшысы Бекет Ахметов өз кезегінде Момунжан Исламовтың ауданда атқарған ауқымды еңбектеріне, тыңғылықты кәсібилігіне тоқталып, жақсы әкім боларына зор сенім білдірді.
Аудан әкімі Алтай Досумбаев мемлекеттік саладағы өзгерістер мен халық игілігіне арналып жатқан істерге кеңінен тоқталып, жаңадан сайланған округ әкімін салтанатты түрде қызмет орнына жайғастырды.
