Жақында аудандық кітапханада С.Сейфуллин атындағы Алматы облыстық әмбебап кітапханасының қолдауымен «Adaldyq alany» жобасы аясында «Парасат жолы» атты орталығының ашылу салтанаты өтті. Аталмыш жоба мемлекетіміздің әр аймағындағы кітапханаларды қамтыды.
Шараның қонақтары ретінде «Nur Otan» партиясы аудандық филиалы партиялық бақылау комиссиясының төрағасы Асыл Байтулақов, Қазақстан жазушылар Одағының мүшесі, Қазақстанның Құрметті журналисі Шаяхмет Құсайынұлы, аудандық ақсақалдар кеңесінің төрағасы Тілеулес Ұзақов, Есік қаласының әкімі Айдар Бошкулов және кітапхана ұжымы қатысты. «Adaldyq alany» жобасының мақсаты – зиялы қауымның және дін өкілдерінің бірлесіп қоғамда тұтастық идеологиясын ілгерілету.
– Түрлі әдеби-танымдық кітаптар арқылы сыбайлас жемқорлықпен күресуге болады. Ол үшін иман, тазалық және парасаттылық сынды қасиеттерді жас оқырмандардың бойына сіңіріп, әртүрлі оқулықтарға баулу арқылы тәрбиелеу қажет. Жоба аясында зиялы қауым өкілдерін жиі шақырып, жастармен кездесу кештерін ұйымдастыру жоспарда бар, – дейді кітапхана басшысы Гүлнар Жұмашқызы.
Айта кетсек, «Adaldyq alany» жобасы Қазақстан Республикасының Сыбайлас жемқорлыққа қарсы іс-қимыл агенттігінің Алматы облысы департаменті мен мәдениет, архивтер және құжаттама басқармасы арасындағы өзара ынтымақтастық кездесуі аясында іске асуда.
Маржан АҒЫБАЙ,
М. Қозыбаев атындағы СҚУ
«Журналистика» кафедрасының 4-курс студенті