Қорам ауылында орын алған көлік оқиғасынан зардап шеккен қыздардың хал-жағдайын білуге Алматы облысы әкімінің орынбасары Батыржан Байжұманов, аудан әкімі Әлібек Жақанбаев өткен аптада Шелек ауылындағы аудандық ауруханаға арнайы барды.
Бүлдіршіндердің қазіргі жағдайымен танысқан олар ата-аналарымен кездесіп, балалардың сауығып кетуі үшін барлық қажетті көмек жасалынатынын айтты. Сонымен қатар Шелек ауруханасына облыстық денсаулық сақтау басқармасы басшысының тапсырмасымен Өтеген батыр кентіндегі балалар ауруханасынан балалар хирургиясы, нейрохирургия, анестезия саласының білікті дәрігерлері келіп, қыздарға медициналық көмек көрсетуде.
Қазіргі таңда бір бүлдіршіннің жағдайы тұрақты болғандықтан облыстық көпсалалы аймақтық балалар ауруханасына ауыстырылған. Қалған екі қыздың бірі есін жиған, біреуі ауыр халде комада жатыр. Оқиға салдарынан жеңіл жарақат алған төртінші қыз үйіне жіберілген.
Мемлекет басшысы Қасым-Жомарт Тоқаев зардап шеккен қыздардың өміріне алаңдаушылық білдіріп, істі өз бақылауына алатынын жеткізген. Алматы облысының басшысы Амандық Баталов оқушылардың емделіп, денсаулықтарын қалпына келтіруге мемлекет тарапынан тиісті шаралар қабылданатынын айтқан.
Айта кетейік, мас күйінде көлік тізгіндеген 54 жастағы азамат Қорам ауылында 8-9 жастағы 4 мектеп оқушысын қағып кеткен. Оқиға орнына жедел жеткен медицина қызметкерлері қыздарды түрлі жарақаттармен Шелек ауылындағы ауруханаға жеткізген. Ал мас жүргізуші қамауға алынып, қазіргі уақытта ҚР Қылмыстық кодексінің 345 бабы «Мас күйінде көлік айдап, жол ережесін бұзу арқылы денсаулыққа зақым келтіру» бойынша қылмыстық іс қозғалуда. Тергеу амалдары басталып, сараптама тағайындалған.
С.МАЙДАБЕКҰЛЫ