«Nur Otan» партиясы Еңбекшіқазақ аудандық филиалы жыл бойы атқарылған жұмыстың қорытындысы бойынша облыста үздік үштіктің қатарынан көрініп, ІІ орынға ие болды.
Өткен аптада облыс орталығында өткен жиынға 20 аудандық және қалалық партия филиалының өкілдері қатысты. Шара барысында жыл бойы атқарылған жұмыстар қорытындыланып, үздіктер марапатталды. Елбасы, «Nur Otan» партиясының төрағасы Н.Ә.Назарбаевтың бастамасымен елімізде жалпыұлттық деңгейде тұңғыш рет өткен партияның сайлауалды іріктеуіне және Қазақстан Республикасы Парламенті Мәжілісі мен мәслихаттары депутаттарын сайлаудағы жемісті еңбектері үшін, 2020 жылы ішкі партиялық жұмыстардың жетістіктері негізінде ІІ орынды иеленген аудандық партия филиалына облыстық филиал төрағасының бірінші орынбасары Гүлнар Тойлыбаева өңір басшысы Амандық Баталовтың Алғыс хатын табыстады.
– Бүгінде жетекші партия халықтың қолдауына ие болып, артылған жауапкершілікті абыроймен атқарып келеміз. Тұрғындардың қордаланған мәселелерін шешуге, өңірлерді дамытуға бар күш-жігерімізді жұмсаудамыз. Соның нәтижесінде, биыл сайлауда «Nur Otan» партиясы айқын басымдықпен жеңіске жетті. Ендігі кезекте дамуға бағытталған сайлауалды бағдарламаны жүзеге асыруға күш саламыз, – дейді аудандық партия филиалы төрағасының бірінші орынбасары Қуат Байғоджаев.
С.НҰРАДИН