Өңіріміздің тарихи-мәдени мұрасын жинап, сақтап, халыққа насихаттап отырған Шелек тарихи-өлкетану музейінің мерейтойы лайықты атап өтілді. Шараға аудандық мәдениет және тілдерді дамыту бөлімінің басшысы Салтанат Беспаева, Шелек ауылдық округінің әкімі Сәкен Абдихалиев, мұражайдың алғашқы директоры болған Алефтина Волкова, мұражайда басшылық қызмет атқарған ауданымыздың құрметті азаматы Жетпісбай Сыдықбеков қатысты.

Мерейлі шараға жиылғандарды мерейтоймен құттықтаған Салтанат Дауысбекқызы музей ұжымының жұмысына табыс тіледі. Сонымен қатар, аудан әкімінің алғыс хатын табыс етті. Құрметті қонақтар мен ауыл азаматтары жүрекжарды тілектерін айтты.

Шелек тарихи-өлкетану мұражайының меңгерушісі Ердос Қалибекұлының айтуынша, мұражайда ауыл  тұрғындарына, оқушылар мен студенттерге көптеген экскурсиялар өткізіледі. Жүздеген адам мұражай қорының қалыптасуына атсалысып, көпшілігі мұражайдың тұрақты достары мен белсенділері қатарын кеңейтіп келеді.

1981 жылы Мәдениет министрлігінің арнайы қаулысымен 5 мамыр күні Шелек тарихи-өлкетану мұражайы ашылды. Содан осы күнге дейін өңір тұрғындарына рухани азық беріп, тарихымыздан сыр шертіп тұрған музей жастардың сүйікті орнына айналған. Бүгінгі таңда мұражай ғылыми деректерді, көне заман ескерткіштерін, олардың үлгі нұсқаларын,өнер туындыларын, мәдени құндылықтарын зерттеп, жылдан жылға толықтыруда. 40 жылдан бері үздіксіз қызмет етіп келе жатқан мұражай өткен 2020 жылы Елбасының «Рухани жаңғыру» бағдарламасы аясында «Ауылым – алтын бесігім» атты байқауда жоғары деңгейде ұйымдастырылғаны үшін облыс әкімі Амандық Баталовтан арнайы марапат алған.

Ілия СҰЛТАН