Еріктілік – бұл мемлекет пен жалпы қоғам дамуының көрсеткіші. Елдің жетістіктері мен жеңістері күнделікті пайдалы және маңызды істерді орындайтын патриот азаматтардың белсенді әрекеттеріне тікелей байланысты. Соңғы кездері елімізде еріктілер қатары молая түсті. Бүгінде еріктілер қоғамның ең белсенді күшіне айналды. Олар жылу күткен жүректерге ізгіліктің отын жағып, көмекке мұқтаж жандарға демеу бола білді.

Жақында тағы да бір қайырлы істің куәсі болдық. Блогер Аден Марғұлан бастамасына үн қосқан аудан еріктілері Есік қаласында тұратын көпбалалы отбасын тосын сыймен қуантты. Еріктілер баспанаға зәру болған  Ахметжановтар  отбасына «Береке» саяжайынан төрт бөлмелі үй сыйлап, отағасына жеңіл автокөлік тарту етті. Тосын сыйға кенелген  көпбалалы ана көңіл толқынысын жұрттан жасыра алмай, көз жасына ерік берді. Бұл ретте отағасы Жайлау Боранбайұлы:«Жақыннан бері бір  жақсылықтың  боларын сезгендей күйде болдық. Енді, міне, көптің көмегімен баспанаға қол жеткіздік. Бізге көмектескен қайырымды жандарға, жақыннан жәрдемші болған жастарға ризашылығымыз шексіз», – деп жүрекжарды тілегін жеткізді.

Арайлым БАҚБЕРГЕН,

жастар ресурстық орталығының маманы