Бүгінде «Nur Otan» партиясының «Бақытты отбасы» жобасы аясында көптеген қордаланған әлеуметтік мәселелер өз шешімін табуда. Елбасының бастамасымен қолға алынған әлеуметтік жоба халыққа пайдасы мен өміршеңдігін көрсетті. Биыл да осы жоба шеңберінде облыс көлеміндегі 40-тан астам әлеуметтік нысан қайта жаңғырмақ.
Аталған жоба аясында қайта жаңғыратын әлеуметтік нысандардың бірі – Есік қаласындағы облыстық көру қабілеті бұзылған балаларға арналған мектеп-интернат. Жақында аталған мектеп-интернатқа «Nur Otan» партиясы облыстық филиалы төрағасының бірінші орынбасары Гүлнар Тойлыбаева, аудандық партия филиалы төрағасының бірінші орынбасары Қуат Байғоджаев, аудандық мәслихат депутаты Бағдат Рахимов арнайы барды.
Интернат директоры Гүлнар Өтепбергенова оқу орнындағы жатақхана мен кітапхананы, арнаулы кабинеттер мен спорт залдарын көрсетті. Сондай-ақ Гүлнар Тойлыбаева мектеп-интернаттағы шәкірттердің спорттық жетісіктерімен танысып, жарық әлемді көрмесе де, жаны нұрға толы дарынды балалардың өнер туындыларын тамашалады.
Бүгінде оқу ордасында мүлдем көрмейтін және нашар көретін 180-нен астам бала тәрбиеленуде. Балалар оқу құралдарымен, жылы сумен және құнарлы ас мәзірімен қамтылған. Директор Гүлнар Өтепбергенованың сөзінше, қазақ тілінде білім алатын балалардың үлесі басым. Алайда оларға қазақ тіліндегі оқулықтар мен көмекші құралдар жетіспейді. Кездесу соңында Гүлнар Қожағұлқызы партия тарапынан аталған мектеп-интернатқа қашан да қолдау көрсетілетіндігін жеткізді.
Ерзат АСЫЛ
