Бір ұлтты тұтас жойып жіберуге жасалған жауыздық тарихтың өшпес таңбасы болып әрдайым жадымызда жатталады. Қолдан ұйымдастырылған ашаршылық та, Алаш арыстарының соңына түсіп, жүз мыңдаған жанды жазықсыз жазалау да – адамзатқа жасалған үлкен қастандық. Тарихқа таңбаланған бұл оқиғалар аудандық кітапханадағы кездесуде басты тақырып болды.
31 мамыр – саяси қуғын-сүргін мен ашаршылық құрбандарын еске алу күні қарсаңында кітапхана қызметкерлері оқырмандарымен тарихи тақырыпты қозғап, ойларын ортаға салды. Жас ұрпақ, әрі елдің болашағы – оқушыларға өткен күннің қасіреті жайлы әңгімелеп, Алаш арыстарының өлшеусіз еңбегін екшеп айтты. Ал ашаршылық жылдарында ұлттың басына төнген нәубет, үлкен қасіретті кітапханашылар тарихшылар мен Алаш қайраткерлерінің естеліктерінен оқып, суреттегеннің өзінде-ақ денең түршігеді. Миллиондаған қандастарымыздан айырылдық, қазақ үшін тер төккен азаматтар айдауда кетті. Бұл – біздің тарих. Ал болашаққа бағдар жасау өткен тарихты танудан басталады емес пе?! Сондықтан оқушылармен осындай кездесулер өткізіп, олардың өз тарихын тануына түрткі болған кітапханашылардың еңбегі зор.
Қ.МҰРАТҚЫЗЫ
