«...Бабамыздың мұңысың сен, домбыра

Анамыздың сырысың сен, домбыра.

Қазағымның жүрегінен жаралған

Даламыздың үнісің сен, домбыра!»

Күмбірлеген домбыраның үнін қазақтың жүрегінің дүрсіліне теңеген белгілі ақын Шөмішбай Сариевтің бұл сөздері қандай керемет! Домбыраға теңеуді дәл тауып, табиғатын терең ашып берген. Қазақтың жанында жаңғырып, халықтың тағдырын, кең даланың тарихын толғаған домбыраны ұлықтау – ұлттың парызы. Осы орайда ұлттық домбыра күніне орай ауданымызда үлкен іс-шара өтті.

Аудандық мәдениет және тілдерді дамыту бөлімінің ұйымдастыруымен Т.Молдағалиев атындағы Мәдениет үйінің алдына өнер сүйер қауым ерте жиналды. Қара домбыраны қолға алып, «Жібек жолы» фольклорлық-этнографиялық ансамблінің қыз-жігіттері қазақтың ұлттық киімімен көз сүйсіндіріп, керемет күйлерімен құлақтың құрышын қандырды. «Көңілашармен» көңілді толқытса, «Адай» күйімен рухты асқақтатып, еңсені көкке көтерді. Аудан өнерпаздары халыққа шағын концерттік бағдарламасымен тарту жасап, әсерлі әндерін әуелетті.

Жиылған жұртты домбыра күнімен құттықтаған аудан әкімі Әлібек Жақанбаев: «Қазақ пен домбыра – егіз ұғым. Қазақ барда домбыра да жоғалмайды», – деп, киелі аспабымызды ұлықтау мақсатында ауданымыздың жас таланттарының бірі Жан есімді балақайға домбыра тарту етті.

Ел Тәуелсіздігінің 30 жылдығына орай маусым айының басында аудандық мәдениет және тілдерді дамыту бөлімі мемлекеттік қызметшілер арасында патриоттық әндер байқауын өткізген еді. Байқаудың жеңімпаздарын марапаттау осынау керемет мерекеге дөп келіпті. Өзгелерден оза шапқан мықтылар аудан әкімінің арнайы дипломымен және бағалы сыйлықтармен марапатталды.

Қазақтың домбырасы әркез төремізде тұрып, талай тарихтың шежіресін, ата-бабадан жеткен мол мұрамыз – жыр мен күйді күмбірлетіп, мәдениетімізді  мәңгілік биіктете бермек.

Құралай МҰРАТҚЫЗЫ