Қазақта «Ауылыңда қарт болса, жазып қойған хатпен тең» деген аталы сөз бар. Қарт – ауылдың көркі, берекесі һәм ұйытқысы. Қарттарды сыйлау, құрмет көрсету – жас ұрпақтың бұлтартпас борышы. Осы ұстанымды негіз еткен Шелек тарихи-өлкетану музейінің қызметкерлері музейде  «Қарты бар елдің қазынасы бар» атты мәдени шара өткізді.

Тағылымды шараға саналы ғұмырларын тәуелсіз еліміздің өркендеуіне, ауданымыздың, ауылымыздың дамуына өз үлестерін қосып, бүгінгі күні бейнетінің зейнетін көріп отырған «Еңбекшіқазақ ауданының құрметті азаматтары» Алмагүл Орымбетова, Әбілбек Айтақынов, Жетпіс Сыдықбаев, Нұрлан Ердәулетұлы қатысты. Қарттардың көңілін көтеріп, аз да болса қуаныш сыйлауды мақсат еткен мәдени шарада Шелек ауылындағы Ы.Алтынсарин атындағы, Т.Кенжебаев атындағы және Шелек ауылдық музыка мектебінің ұстаздары мен оқушылары ән-күйден шашу шашып, өлеңдерін оқыды. Сонымен бірге «Ы.Алтынсарин» және «Отан патриоты» медалінің иегері, Т.Кенжебаев атындағы орта мектебінде ұзақ жыл ұстаздық еткен зейнеткер, қолөнер шебері Анаят Жексенбайұлы өз туындыларынан көрме ұйымдастырды. Ұлтымыздың күнделікті тұрмысында пайдаланатын заттарын түрлі материалдардан жасаған шебердің көрмесі мәдени шараның көркін қыздырып, ажарын аша түсті. Шара соңында музей залдары бойынша экскурсия жүргізіліп, қарттарымыз өздерінің танымдық әңгімелерін айтып, сыр шертті.

Жанар БОРАЛТАЙҚЫЗЫ,

Шелек тарихи-өлкетану музейінің экскурсия жүргізушісі.