Кәсіподақ – жаһандану үдерісінің белсенді мүшелері. Еңбек адамдарының құқығын қорғауда, оларға материалдық, моральдық тұрғыда көмек көрсетуде жетекші рөл атқарады. Бүгінгідей дамыған қоғамда еңбек даулары мен осы бағыттағы өзекті мәселелер кәсіподақ арқылы шешілуі тиіс. Елімізде, оның ішінде ауданымызда бұл бағыттағы жұмыстар қай деңгейде? Кәсіподақ қызметкерлерінің мерекесі қарсаңында жұмыс атқарып жатқан кәсіподақ ұйымдарына жүгінген едік.

«Алматы облысы білім беру мекемелер қызметкерлерінің жергілікті кәсіптік одағы» қоғам-дық бірлестігінің Еңбекшіқазақ аудандық комитеті филиалының төрағасы Серік Надырбаев ұстаздар қауымының мәселелерін шешуде, құқықтарын қорғауда ауқымды жұмыстар атқарылып жатқанын айтты.

– Бізге ағымдағы жылы мұғалімдер тарапынан көптеген арыз-шағымдар түсті. 100-ден астам адам ауызша шағымданып, 20 кәсіподақ мүшесі жазбаша арыз қалдырды. Айталық, декреттік демалыста отырған мұғалімді мектеп директоры жұмыстан шығарған. Аталған басшыға заңға қайшы әрекет жасағаны жөнінде түсіндіріліп, мұғалім жұмысына орналастырылды және тиісті еңбек демалысы беріліп, жәрдемақы төленетін болды. Сонымен қатар алғашқы әскери дайындық пәнінің оқытушыларынан ұжымдық ашық хат түсті. Хатта аталған пән мұғалімдеріне далалық оқу жиынына вариативті бөліміне қарастырылған 30 сағаттың жалақысын бөлек төлеу қажеттігі жайында жазылған. Бұл мәселе алғашқы әскери дайындық пәні мұғалімдерінің пайдасына шешілді, – дейді Серік Надырбаев.

Кәсіподақ төрағасының айтуынша, түскен барлық шағымдар бойынша тиісті шаралар қабылданған. Бұдан бөлек, кәсіподақ ұстаздардың емделуіне санаторлық-курорттық орталықтарға 362 жолдаманың 50 пайызын төлеп берген. Түрлі спорттық және басқа да іс-шараларға демеушілік етеді. Қаңтар айында білім  беру саласының қызметкерлері арасында дәстүрлі шаңғы тебуден жарыс ұйымдастырылып, ұстаздар қауымы қысқы спорт түрлерінен бақ сынайды. Сондай-ақ кәсіподақ ұйымы «Президенттік шақырым» сынды басқа да спорттық жарыстардың өткізілуіне, қатысушылар мен жеңімпаздарды марапаттауға демеушілік жасап, түрлі концерттік шаралар өткізеді. Үздік білім мекемелері мен мамандарды анықтау мақсатында байқаулардың өтуіне мұрындық болып, түрлі деңгейдегі сайыс-тар мен олимпиадалардан жүлделі оралған оқушылардың жетекшілерін назардан тыс қалдырмайды. 

Әлемді әуреге салған коронавирус пандемиясы барлық салаға әсер етуде. Осыған орай, коронавирус және пнев-мониямен ауырған білім са-ласының қызметкерлеріне кәсіподақ қаржылай көмек көрсетуде. Сонымен қатар оқыс оқиғалардан зардап шеккен кәсіподақ мүшелері де назардан тыс қалмаған. Үйлерін өрт шалған Абай атындағы және Терешкова атындағы орта мектептің ұс-таздарына қаржылай қолдау білдірген.

Бұл – аталған кәсіподақ бірлестігі атқарған жұмыстың бір парасы ғана. Төрағаның сөзінше, бұдан бөлек ұлағат иелерінің құқығын қорғауда бірқатар істерге ұйытқы болған әрі осы бағыттағы жұмыстар жүйелі жалғаса бермек.

Бұдан бөлек ұстаздар қауымының және түрлі сала қызметкерлерінің басын қосқан «YNTYMAQ» РҚБ салалық кәсіподағының аудандық филиалы ашылды. Ауданымызда осы жылдың 15 наурызынан бастап жұмыс істеп жатқан кәсіподақ филиалының төрағасы Бағдат Рахимов еңбек ұжымдарында сапалы әрі өркениетті әлеуметтік-еңбек қатынастарын қалыптастыру үшін күш салатынын айтты:

– Бүгінгі күні қарапайым еңбек адамдарының құқығын қорғайтын, оларға уақытылы заң аясында кеңес беріп, қолдау танытатын қоғамдық ұйымдар аса қажет. Біздің басты қызметіміз – мемлекеттік мекемелермен тығыз байланыс орната отырып, қарапайым жұмысшылардың  мүдделерін қорғау, қызмет барысында туындайтын мәселелерді бірге шешу, кәсіподақ тарапынан барынша қолдау көрсету, – дейді Бағдат Болатұлы.

Бұған қоса, «YNTYMAQ» салалық кәсіподағы республика-лық көлемде Еңбек туралы заң жобасына өзгерістер енгізуге өз-дерінің ұсыныстарын жолдаған.

– Бүгінде еліміздегі Еңбек туралы заңға бірқатар өзгерістер енгізу қажет. Бұл бағытта біздің кәсіподақ жүйелі жұмыс атқаруда. Қазіргі уақытта кез келген мекемеде жұмыс істейтін техникалық қызметкерлерге еңбек демалысына шыққан кезде емделу үшін ақы төленбейді. Бұл олқылықтың орнын толтыру қажет. Сонымен қатар еңбек демалысына шыққан қызметкерге жұмыс беруші тарапынан санаторлық-курорттық орталықтарға жолдама берілуі үшін күш салып жатырмыз. Ең бастысы, мекемелердегі кәсіподақ жетекшісінің құқығын қорғауды басты назарға аламыз. Себебі, сол жердегі жұмысшылар мен басшылық арасындағы мәселелерді шешуде жетекші рөл атқарады. Осылайша, басшылыққа қарсы шығуға тура келеді. Ал оны басшылықтың қудаламайтынына кім кепіл? Сондықтан басшылық мекемедегі кәсіподақ жетекшісін негізгі жұмысынан босату үшін кәсіподақ филиалының келісімін алу қажет. Осы мақсатта жұмыс атқарып келеміз. Жұмыс беруші мен жұмысшы арасындағы қарым-қатынасты нығайту үшін қолайлы заң жобасы әзірленуі керек, – дейді Бағдат Рахимов.

«YNTYMAQ» салалық кәсіподағы алдағы уақытта пандемия кезіндегі жұмыс беруші мен жұмысшы арасындағы келісім-шартты да қайта қарау керектігін алға тартады. Пандемия салдарынан жұмыстан қысқартылған қызметкерге ең төменгі жалақы мөлшерінде жәрдемақы берілуі тиіс. Кәсіподақ заң жобасына осындай ұсыныстар енгізу үшін күш салуда.

С.НҰРАДИН.