Жақында  аудан көлемінде «Қыс-2021» республикалық командалық-штабтық оқу-жаттығу өтті. Алдымен В.Терешкова атындағы орта мектептің алаңында аудандық төтенше жағдайлар бөлімінің жауапты қызметкерлері мен  6654 әскери бөлімнің  жауынгерлері, сондай-ақ өңірдің тіршілігін қамтамасыз ететін коммуналдық кәсіпорындардың күш-құралдары мен техникалардың әзірлігін тексеру мақсатында саптық тұрғызу ұйымдастырылды. Оған 100-ден  аса қызметкер мен 20-ға жуық түрлі техника жұмылдырылды.

Оқу-жаттығуға аудан әкімінің орынбасары Асыл Ваисов қатысып, жедел әрекет ету жасағының дайындық деңгейін саралады. Аудандық  төтенше  жағдайлар бөлімінің  басшысы Р.Каримжан қысқы дайындықтар бойынша қолға алынған істердің нақты жағдайын баяндады.

Оның сөзінше, қысқы дайындыққа барлық күштер сақадай сай. Саптық жиын аяқталғаннан кейін қыс мезігілінде туындайтын төтенше жағдайлар кезінде өзара іс-қимылдар жүйесі пысықталды. Алдымен Есік көлі бойында орын алуы мүмкін апатты жағдай қарастырылды. Жаттығу сценарийі бойынша туристер мінген автобус таулы өңірде қар құрсауында қалды. Жедел хабарламадан кейін азаматтық қорғау қызметкерлері лезде әрекет етіп, зардап шеккен жолаушыларды құтқаруға кірісті. Төтенше жағдайлар бөлімі мен жедел жәрдем қызметкерлері туристерді  таудан аман алып  түскеннен кейін, 6654 әскери бөлімінің  жауынгерлері құтқарылғандарды ыстық аспен қамтамасыз етті. Шара барысында мектеп оқушыларына түрлі апатты жағдайдың алдын алу жайында мағлұматтар беріліп, қиын жағдайдан құтылудың  нақты әдіс-тәсілдері көрсетілді. Қорыта айтқанда, құтқарушылар қыстың қаһарына толық дайын екендіктерін дәлелдеді.

Сала басшыларының айтуынша, биылғы қысқы маусымға дайындық тыңғылықты.

Е.АСЫЛ