Жас ұрпақ тәрбиесі – адамзаттың мәңгілік тақырыбы. Ұрпақ тәрбиесі қоғамнан тыс,  оқшау тұрған құбылыс емес. Ол қоғамның, заманның бағыт-бағдарымен, тыныс-тіршілігімен бірге жүріп отырады.

Жақында Рахат №1 орта мектебінде «Тіл жанашырлары» апталығы аясында қазақ тілі мен әдебиеті пәнінің мұғалімі Алмагүл Нұғманның «Руханият»  ағартушылық-тәрбиелік жобасының таныстырылымы өтті. Жас ұрпақты рухани уызға  қандырып, ұлттық құндылықтарға құштар ететін жобаның таныстырылымына  аудандық «Еңбекшіқазақ» газетінің бас редакторы Хайролла Ахметжанов, мектеп директоры Бибігүл Букаева мен ұстаздар қауымы қатысты. Ең әуелі аталған жобаның жай-жапсарын таныстырған Алмагүл Әлиханқызы бұл игі іс ана тілімен сусындаған, ататегі тамырынан нәр алып, санасына салт-дәстүр сіңген, ұлтжанды интеллект ұрпақ тәрбиелеуге  ықпал ету үшін қолға алғандығын атап өтті.

– Педагог ретіндегі арманым – текті, ар-намысты, ұлтына адал, заманауи интеллект ұрпақ тәрбиелеу. Сол үшін мен ұрпақ тәрбиесінде қазақ тілі, ататек, салт-дәстүр, мәдениет және шешендік өнер сынды төрт бағытты терең қамтуды ұсынамын, – дейді жоба  жетекшісі. Шараға  қатысқан  ардагер журналист Хайролла Қасымұлы ұрпақ тәрбиесі мәңгілік маңызын жоймайтындығын, оны ұлттық құндылықтармен ұштастырып, жаңа заманның рухани сұранысымен толықтырып отыру қажеттігін айтты. Ал «Руханият» ағартушылық-тәрбиелік жобасының таныстырылымына келген мектеп мұғалімдері бірауыздан игі іске қолдау білдіретін-дерін жеткізді. Келешекке кемел адам  ретінде қадам басуды мақсат еткен жоба бүгінде Рахат №1 орта мектебінде іске асырыла бастады.

Е.АСЫЛ.