8 наурыз – халықаралық әйелдер күні қарсаңында Т.Молдағалиев атындағы аудандық мәдениет үйінде аудан әкімінің мерекелік салтанатты жиыны өтті.

Көктем күніндей құлпырған арулар, асыл жар мен ақжаулықты әжелер керемет көңіл күймен концертке ауданымыздың әр түпкірінен жиналды. Аудан әкімі Қуат Сұлтанғазиевтің атынан әкімнің бірінші орынбасары Айбек Бидаев қоғам өміріндегі әйелдер қауымының алар орнын ерекше атай отырып, «Отбасының ұйытқысы ғана емес, бүкіл елдің тұтқасы болып отырған нәзік жандылар, сіздерге алғысымыз шексіз! Мерейлі мерекелеріңізбен шын жүректен құттықтап, мықты денсаулық, бақ-береке және әйел бақытын тілеймін. Тәуелсіз еліміздің гүлденуі жолында абыройлы еңбек ете беріңіздер!», – деп алғысын айтты. Сонымен қатар ұрпақ тәрбиелеп отырған көпбалалы аналар, «Алтын» мен «Күміс» алқа иегерлері, денсаулық пен білім саласында, спорт пен мәдениетте, азаматтық қорғаныс пен төтенше жағдайлар қызметтерінде және өзге де салаларда ерлермен қатар еңбек етіп, ауданның қоғамдық-саяси өміріне белсене араласып, әлеуметтің әлеуетін көтеруге атсалысып жүрген жаны нәзік қыз-келіншектер қауымына мерекелік Алғыс хаттар мен Грамоталар табыстады.

Салтанатты жиын мерекелік концертке ұласып, әуезді ән мен тәтті күйден шашу шашылды.

Қ.МҰРАТҚЫЗЫ.