АУДАНЫМЫЗДА НАУРЫЗ МЕЙРАМЫ КЕҢ КӨЛЕМДЕ ТОЙЛАНДЫ. АУДАНДЫҚ Т.МОЛДАҒАЛИЕВ АТЫНДАҒЫ МӘДЕНИЕТ ҮЙІНІҢ АЛАҢЫ ЕРЕКШЕ БЕЗЕНДІРІЛІП, АҚБОЗ  ҮЙЛЕР ТІГІЛДІ.

Соңғы екі жылда індетке байланысты карантиндік шектеу шаралары сақталып, айтулы мейрамымыз тойланбай келгені белгілі. Алайда бұл жолы қалыптасқан дәстүрден жаңылмаған Есік жұртшылығы мәдениет үйінің алаңын мерекелік думанға толтырды. Береке бастауы болған мейрамға асыға келген ағайын бірі-бірімен көрісіп, қуана жүздесті. Мерекені аудан өнерпаздары театрландырылған қойылымдармен қыздырып, әсем әндермен әрледі. Молшылық пен тоқшылық тойына жиналған жұртшылықты аудан әкімі Қуат Елеусізов құттықтады. Аудан әкімі және оның орынбасарларымен бірге аудандық мәслихат депутаттары, аудандық ардагерлер кеңесі, аудандық қоғамдық кеңесінің төрағалары мен мүшелері мерекеге орай тігілген киіз үйлерді аралап, тұрғындарға жылы лебіздерін арнады. Мерекенің  дәмінен ауыз тиген жұртшылық әз Наурыздың әсеріне бөленіп, ұлттық спорт түрлерінен бақтарын сынап көрді. Атап айтсақ, палуандар белдесіп, жастар арқан тартты, асық ойнап, қол күрестірді. Бозбалалар мен бойжеткендер алтыбақан тепті. Жайнаған жүздерден жақсылықтың лебі  ескендігін аңғардық.

Е. АСЫЛ.