Өткен аптада жаңадан қалыптастырылған аудандық қоғамдық кеңестің алғашқы отырысы өтті. Жиынға аудандық орталық сайлау комиссиясының төрағасы Бақыт Жексембиев, мәслихат хатшысы Бекет Ахметов қатысты. Мәслихат хатшысы өз сөзінде қоғамдық кеңесті қалыптастыру жөніндегі жұмыс тобының басшысы Тілеулес Ұзақовқа алғыс білдірді.
– Қоғамдық кеңес – ауданымыздағы маңызды шешімдердің қабылдауына қатыса отырып, жариялы, ашық болуын қамтамасыз ететін бақылаушы әрі кеңесші ұйымға айналып отыр. Себебі кеңестің заң аясында бекітілген орасан зор әлеуеті бар. Сондықтан ұйым атқарушы билік пен қоғам арасындағы ынтымақтастықты бекіте түсуге үлес қосары сөзсіз – деген Бекет Төлегенұлы кеңес мүшелерін таныстырып, жұмысына табыс тіледі.
Күн тәртібіндегі алғашқы мәселе бойынша сөз алған кеңес мүшесі Надо Надыров қоғамдық кеңес төрағасына Серік Надырбаевты ұсынды. Ұсыныс бірауыздан қолдау тапты. Өз сөзінде аудандағы өзекті мәселелердің шешілуіне белсене атсалысатынын жеткізген Серік Дүйсебайұлы билік пен халық арасын жалғайтын алтын көпір – қоғамдық кеңес бағытты жұмыс атқаратынын айтты.
Жиын барысында кеңестің қызмет бағыттары бойынша комиссиялары құрылып, кеңес төралқасының құрамы сайланды. Ереже бектіліп, 2022 жылға арналған жұмыс жоспарының жобасы қалыптастырылды.
С.НҰРАДИН.
