Еліміз тәуелсіздік алған алғашқы жылдары «Еңбекшіқазақ» газетінің құрамында сайдың тасындай жарқыраған жасындай журналист қыз-жігіттер қызмет атқарды. Тек аттарын ғана атап шықсам байырғы оқырмандарымыз солардың әрқайсысын, жазған мақаласынан, авторлық қолтаңбасынан таниды. Осы Дулат, Маржан, Игорь есімді қаламгерлер қатарында бүгіндері алпысты алқымынан алып, қазақ жастарының газеті «Жас алашты» басқарып отырған Қайрат Мәтірековті ерекше атар едім. Олай дейтінім, жастар газетінің бастауында тұрған аты аңызға айналған Ғани Мұратбаевты, шындықты шырылдатып газетке басатын, жемқорларды итке теңеп «Қазаннан қақпақ кетсе иттен ұят кетеді» деп дөй-дөкейлердің өздерін де жанын шығара сынайтын Шерағаң – Шерхан Мұртазаның, балалардың, жастардың сүйікті жазушысы Бердібек Соқпақбаевтың басқарған «Жас алашын» жетекшілігіңе алуға жүрегің қалай дауалады», – деп әзілдеймін бір кездері маған орынбасар бола жүріп, айтарлықтай істерді тындырған Қайрат Болатұлына. Сөзім дәлелсіз жалаң болмас үшін ауданымызға, облысымызға айғақ болып, резонанс-дүмпу тудырған бір істің ұзын ырғасын айтып берейін.

Тоқсан бірдің (өткен ғасыр) жаз айында жалғанды жалпағынан басып, Заң талаптарынан ат-тонын ала қашып, мемлекет мүлкін оңды-солды шашып, мораль мен ұятты ұмытып, мейманасы тасып, қарамағындағы жұмысшы қызметшілеріне дөрекі сөз айтуға, қол жұмсауға дейін барған үлкен шаруашылық басшысы туралы «Қырық кісі бір жақ, қыңыр кісі бір жақ» тақырыпты мақала жариялады Қайрат Болатұлы. Ол директордың «крышасы» да мықты еді, сот жүйесінде жақтаушысы да бар еді. Мақала авторын да, газет басшысы мені де іс қозғап, сотқа бергізді. Соттың алдында тұрмыз. Шешімнің жобасы да дайын екен: «кінәлі – газет, жазықты – мақала авторы» деп тасқа басқан құжатта бізге салынған айыппұл көлемі, мақаланы терістеуге міндеттелген және оның кейіпкерінен иіліп кешірім сұрау қарастарылған. Жазған құлда жазық жоқ, айып төлеуге пұлымыз жоқ, сот шешіміне қарсы тұруға дәлел-қауқарымыз жоқ деп қамығып тұрғанда газеттің досы, белсендісі түрік азаматы есіктен рұқсат сұрап кіріп, жиырма, отыз беттен тұратын «Итоги ревизии...» (қазіргіше аудит қой) деген тақырыптағы құжатты ұстата қойды. Сөйтсем Қайрат қызметкерім облыстық басқарма жүргізген аудит қорытындысын алуға келісіп қойған екен. Сот шешімін оқи бастаған судьядан кешірім сұрап, облыстан жеткізілген құжатпен танысуын, таныстыруын өтіндім. Бізді сотқа берген шаруашылық басшысының өңі бұзылып, арызын қайтып алатынын жариялады. Бұл әділеттіліктің жеңісі, газет редакциясының, мақала авторы Қ.Мәтірековтың жеңісі деп бағалап, өз тарапымнан  алғыс жариялағаным есімде. Бұл журналистер тірлігінен, әріптесім Қайрекеңнің қызмет қырларынан бір ғана эпизод. Сондықтан қазақтың марғасқалары басқарған «Жас алашты» жалғастырып жатқан Қайрат Болатұлына – алпысыңды талтүсім деп біл, өтпелі қиын кезеңде қызметтес болған редактор ағаңды ұстазым дей жүр, «Жас алашымыз» жасай берсін, еліміздің ертеңі жарқын болсын, газетіміз жеткен мерейлі жасқа өзің де жет! – деп тілеймін.

Хайролла АХМЕТЖАНОВ,

«Еңбекшіқазақ» газетінің, mezet.kz интернет-ресурсының бас редакторы,

Қазақстанның құрметті журналисі.