Батыр бабаларымыздың ерен ерліктерінің арқасында Ұлы Отан соғысының оты сөнгеніне биыл 77 жыл. 9 мамыр – ел үшін жанын құрбан еткен ерлерімізді еске алып, халықты бейбітшілікке шақыратын мәні зор мереке. Аталған мейрам Есік қаласының орталығында, ҰОС-ның ардагерлеріне арналған ескерткіштің алаңында аталып өтті.

Мереке басында Қаракемердегі 6654 әскери бөлімі сарбаздарының бастауымен, аудан әкімі Қуат Елеусізұлы, аудан ардагерлері мен тыл еңбеккерлері, аудан тұрғындары ҰОС ардагерлеріне арналған ескерткішке гүл шоқтарын қойып, батырлардың рухына тағзым етті. Салтанатты жиынға жиылған қауым қызыл аяқ қар кешкен, жалаң аяқ жар кешкен батырларды бір минуттық үнсіздікпен еске алды.

Аудан тұрғындарын Ұлы Жеңіс күнімен құттықтаған аудан әкімі Қуат Елеусізұлы ардагерлердің ерлігі – ұрпаққа үлгі екенін айтты:

– Кез-келген соғыстың қасіреті мен зардабын ешқандай дүние толтырып бере алмасы анық. Ата-бабаларымыз ел мен жер үшін, ұрпақ үшін кеудесін оққа тосты. Өскелең ұрпақ олардың ерліктерін ұмытуға құқы жоқ. Себебі тарих бетінен жойылмайтын сұрапыл соғысқа қатысқан батырларымыздың өмір жолы бізге үлкен өнеге. Халқымыздың қас батыры Бауыржан Момышұлы «Бүлдіршіндердің айғай-шуынан артық көркем музыка ойлап табу мүмкін емес» дейді. Яғни, қасиетті Отанымызда бейбітшілік туын биік ұстау – әрбір азаматтың басты міндеті, – дей келе барша аудан тұрғындарын Жеңіс мерекесімен құттықтады.

Мереке аудандық мәдениет үйі қызметкерлерінің рухты әндерімен жалғасты.

Салтанантты шара соңында аудан әкімі Қуат Сұлтанғазиев бастаған топ ауданымыздағы қос батырымызды құттықтауға бет алды. Алмалы ауылында тұратын ҰОС ардагері Жылқыбай Тәжіқұлов пен Алға ауылының тұрғыны Солтанбай Жарықбасовтың шаңырақтарына арнайы барып, төл мерекелерімен құттықтады. Сый-сияпаттарын табыстап, ақ баталарын алды. Сонымен қатар, мереке қарсаңында өмірден озған ардагер Николай Савраевтың туыстарына көңіл айтты.

 Ринат НАРХАНОВ.