Жуырда Қаратұрық ауылдық округіндегі «Достық» мешіті ел игілігіне берілді. Бірлігі жарасқан Достық ауылында қазығы қағылған мешіттің ашылуы салтанатты түрде аталып өтті.

Имандылық пен ізгілікке шақыратын Алла үйінің құрылысын Марлан Сыдыков пен Нүсіпжан Омаров  өз демеушілігімен жүргізген. Мешіттің бой көтеруіне ықпал жасап, күш-жігерін аямаған демеушілерге ауыл тұрғындары мен қарттарымыз ризашылығын білдіріп, ауыл ақсақалдары ақ бата беріп, қазақи салт-дәстүр бойынша тұлпар мінгізіп, шапан жапты.

Кең орынды мешіттің ашылу салтанатына Алматы облысының құрметті азаматтары - Елеусіз Сұлтанғазиев және Бешен Доғалов, «Аманат» партиясы аудандық филиалының атқарушы хатшысы Қуат Байғоджаев, ұйғыр этномәдени орталығының төрағасы Шаймардан Нурумов, Қаратұрық ауылдық округінің әкімі Айбек Ілебаев, ауданымыздың бас имамы Сапархан Төреқұлов, әнші Серікбол Сайлаубек, өңірлік журналистер мен құрметті қонақтар қатысты.

Жұрт игілігіне берілген құлшылық үйінде бір мезетте 100-ге жуық адам намаз оқи алады. Мешіт ішінде намаз оқуға арналған үлкен зал мен сыртқы ас беретін орны бар. Аталған мешіт ғимараты жылу жүйесімен қамтылған. Жалпы, ауылдық округте жаңадан ашылған мешіт «Достық» мешіті деп аталатын болады.

Эльмира ӘЗІЛЖАН