Биылғы барыс жылын Мемлекет басшысы Қасым-Жомарт Тоқаев «Балалар жылы» деп жариялаған болатын. Жас ұрпақ ертеңгі елдің иесі болу үшін олардың рухани кемелденуі, ұлттық құндылықтарды ұлықтап өскені маңызды. Ол үшін балаларды отбасынан, «тарыдай болып кіріп, таудай болып» шығатын мектеп қабырғасынан тәрбиелеудің мәні зор.
Көктөбе ауылдық округінің Қызылжар ауылындағы «Дария» балабақшасының тәрбиешісі Ақмоншақ Әзизханқызы үш жылдан бері аталған бөбекжайда мемлекеттік тілдің жанашыры ретінде қызмет етіп келеді. Ақмоншақ Әзизханқызы әзірбайжан ұлтының өкілі болғанымен мектепте қазақ тілінде білім алыпты. Білікті тәрбиеші ұлт руханиятын ұлықтайтын облыстық және республикалық додаларда сан мәрте жүлдеге ілігіпті. Ол қашан да мемлекетік тілді қадір тұтататындығын айтады.
– Тілге құрмет – елге құрмет. Демек әрбір қазақстандық мемлекеттік тілді қадірлеп, қастерлеуі тиіс. Тіл мәртебесі – ел мерейі. Ана тіліміздің мәртебесін үстем етіп, елміздің мерейін көтерейік. Тілсіз халықтың, елдің өмір сүруі мүмкін емес. Әлем таныған ел болу үшін ана тіліміздің жұлдызын биіктетуіміз қажет. Бұл біздің басты парызымыз. Туған жерге деген сүйіспеншілік туған тілді жетік меңгеруден басталады, – дейді Ақмоншақ Әзизханқызы.
Сонымен қоса, үздік тәрбиеші өзінің 4 жасар қызын да ана тіліміздің уызына жарытып өсіруге күш салып келеді екен. 4 жасар Марьям Хукиева ақиық ақын Мұқағалиев Мақатаевтың 90 жылдығына орай ұйымдастырылған «Ғасыр ақыны – Мұқағали» атты республикалық байқаудың жеңімпазы атанған. Зерделі ана бүгінде балапанын отансүйгіштікке баулуда.
– Патриот болу деген – ел азаматының адамагершілік және саяси қағидатты, туған жерге, елге сүйіспеншілігі, қажет болса мемлекет жолындағы міндетті жеке мүддеден жорғары қоюды талап ететін әлеуметтік сезім. Туған елінің құндылықтарын, әсіресе, тілі мен мәдениетін құрметпен жоғары ұстап, оны жас ұрпақтың зердесіне құя білуміз шарт, – дейді Ақмоншақ Әзизханқызы. Бүгінде жас бүлдіршін Марьям Хукиева ұлттық қолөнерімізге де ден қойыпты. Тіпті республикалық қолөнер байқаударында бақ сынай бастаған. Жаңа Қазақстанның болашағы – жас өрендердің сапалы білім, саналы тәрбие алуына отбасының зор әсер ететіні сөзсіз.
Е. АСЫЛ.
