«Адамдық борышың – халқыңа еңбек қыл» деген Шәкәрім данамыздың сөзіне сай, елге еңбегін арнаудан жалықпаған азаматтар аз емес қазақта.  Көктөбе ауылының тұрғындары үшін сондай есіл ерлердің бірегейі – Нұрманбетов Болатбек Нұрдәулетұлы. Қысқа ғұмырында ауданымызда ауыл шаруашылық саласының дамуына үлес қосқан, ауылдастарына қашан да қамқорлықпен қараған ер есімі ел есінде мәңгі сақталмақ. Сөзіміздің бір дәлелі – жуырда Көктөбе орта мектебінің аумағынан Болатбек Нұрдәулетұлының атында заман талабына сай спорт алаңының ашылу салтанаты өтті.

Аталған шараға Көктөбе ауылының тұрғындары, Болатбек Нұрманбетовтың балалары, ұстаздар мен оқушылар қатысты. Көктөбе орта мектебінің директоры Айжан Жақыпбекқызы арда азаматтың атқарған еңбектері мен кейінгіге мұра болып қалатын өнегелі істеріне кеңінен тоқталып, спорт алаңының салынуына демеушілік көрсеткен Болатбек Нұрдәулетұлының ұл-қыздарына мектеп ұжымының атынан зор алғыс білдірді. Өз кезектерінде құттықтау сөз алған Көктөбе ауылдық округінің әкімі Берік Дәулеткелдіұлы да оқушылар мен ұстаздарды, ауыл тұрғындарын су жаңа спорт алаңының ашылуымен құттықтады. Сауабы мол, игілікті іс болған спорт алаңы еліміздің атын аспандататын азаматтардың өсуіне үлес қосады деген сенім білдірді.

Айтулы жаңалыққа шынайы қуанып келген ауданымыздың құрметті азаматы Айша Рақышқызы, марқұмның досы Бауыржан Сабырбаев сынды көптеген үлкендер қауымы жүрекжарды лебіздерін арнады. Болатбек Нұрманбетовтың көзін көрген жандар ерекше естеліктерімен бөлісіп сыр шертті. Кейінгіге нағыз үлгі боларлық азамат екенін тілге тиек етті.

Көктөбе ауылында туып өсіп, 1986 жылы  Көктөбе кеңшарының 1-ші бөлімшесінің меңгерушісі, 1988 жылы Көктөбе кеңшарының бас аграномы, 1991-1996 жылдары Балтабай кеңшарының директоры болып қызмет атқарған тұлға 1996 жылдың қазан айында 41 жасында жол апатынан дүниеден озған. Ауылдастары Болатбек Нұрманбетовтың адамгершілігі мен елге деген шексіз адалдығын, әркімнен кездеспейтін парасаттылығын сағынышпен еске алды. Айша апамыз: «Болатбектің ғұмыры келте болмағанда, үлкен лауазымды қызметтерді атқарып, еліміздің өркендеуіне өлшеусіз үлес қосатын бірден-бір тұлға боларына күмәнім жоқ еді», – деп ойын айтты.

Салтанатты рәсім барысында мектеп оқушылары ән айтып, күй тартып концерттік бағдарламаларын көпшілік назарына ұсынды. Спорт алаңының лентасын қимастан бұрын ауыл имамы Болатбек Нұрманбетовтың әруағына құран бағыштады. Ауыл үлкендері спорт алаңының лентасын қиып, әжелер шашуын шашып, қуанышты көңіл күймен ауыл халқы үшін футбол ойынынан жарыс бастауын алды.

Ринат НАРХАНОВ.