Аудан әкімі Алтай Досымбаев жаңа сайланған Рахат ауылдық округінің әкімін округ активіне таныстырып, жұмысына сәттілік тіледі.

18 қыркүйекте Рахат ауылдық округінде әкім сайлауы өткен болатын. Жергілікті тұрғындар саяси науқанға белсене қатысып, өз таңдауларын жасады. Нәтижесінде 89.8 пайыз дауыс жинаған Қайсар Богусбаев айқын басымдықпен жеңіске жетіп, Рахат ауылдық округінің әкімі болды. Рахат ауылдық округі әкімдігінде өткен жиынға аудан әкімі Алтай Досымбаев, аудандық мәслихат хатшысы Бекет Ахметов пен сайлау комиссиясының төрағасы Бақыт Жексембиев және ауыл ақсақалдары қатысты. Ең әуелі округ активіне сайлаудың қорытындысын жариялаған аудандық сайлау комиссиясының төрағасы Бақыт Жексембиев жаңа әкімге қызметтік куәлік табыстады.

Ел бастаған еріне ақ жол тілеу – ата дәстүріміз. Сол бір сара салтымыз негізінде ауылдық округтің ардагерлер кеңесінің төрағасы жаңа сайланған әкімге ақ батасын беріп, қызметіне толағай табыс тіледі. Жиналысты қорытындылаған Алтай Машикұлы ауылдың әлеуметтік-экономикалық жағдайын жақсартпай, тұтастай ел экономикасын көтеру қиындығын, онда қордаланып қалған мәселелер аз емес екендігін тілге тиек етті. Аудан басшысы соңғы кезде жиі көтеріліп жүрген жайылым, шабындық жерлер мен сапалы ауызсу, жол, медицина саласындағы маман тапшылығы, ауыл мәдениеті мен спортты дамыту мәселелері жаңа сайланған округ әкімі Қайсар Нұрболатұлының назарында болу керектігін айтты.

Е.АСЫЛ.