Аудандық ардагерлер кеңесінің ұйымдастыруымен қарттар күніне орай ардагерлер арасында балық аулау спорт түрінен аудандық жарыс өтті. Аталған балық аулау сайысына Ұлы Отан соғысының ардагері Сұлтанбай ата Жарықбасов және өзге 11 зейнеткер қатысып, көлге қармақ тастады.

Күн ұясынан көтеріле бастағаннан-ақ қармағын асынып, ардагерлер уағдаласқан орынға жинала бастады. Жылдағы дәстүрден жаңылмай, балық аулау бәсекесіне қызу дайындықпен келген бәрі. Қарттардың таза ауада демалып, саламатты өмір салтын ұстануына негізделген бұл үрдіс тек өткен жылдары  індеттің салдарынан өткен жоқ. Қалай десек те, жасы егде тартқан қарияларға зілтемірді көтеріп, қашықтыққа жүгір деу әбестік болар. Олар үшін таптырмас спорт – балық аулау. Қазақ – қариясын сыйлаған халық. Қарияның батасынсыз қазақ қоғамында қордалы байламдар жасалып, іс басталмаған. Атам заманнан бері келе жатқан игі дәстүр бұл. Сол дәстүрдің аясында бастау алған балықшылар сайысы ардагерлердің батасымен басталып, түрлі марапатпен қорытындыланды. Шара соңында ардагерлер кеңесінің төрағасы Тілеулес Ұзақов балық аулауға қатысқан барлық ардагерлерге алғыс білдірді.

Е.АСЫЛ.