Ел Президенті Қасым-Жомарт Кемелұлы Тоқаевтың ӘДІЛЕТТІ МЕМЛЕКЕТ. БІРТҰТАС ҰЛТ, БЕРЕКЕЛІ ҚОҒАМ атты жолдауын қолдау, насихаттау мақсатында «Ұлттық Ұлан» ән-би ансамблі аудандық мәдениет үйінде «Мен Қазақстан Республикасына қызмет етемін» атты шығармашылық концерттерін өткізді. Айтулы шараға ардагерлер, әскерилер, мемлекеттік қызметкерлер, полиция басқармасының қызметкерлері, аудан тұрғындары мен жастар қатысты.

Іс-шараның басында Ұлттық Ұланның Бас қолбасшысының тәрбие және әлеуметтік-құқықтық жұмыстар жөніндегі орынбасары, Халық Қаһарманы Қайрат Үмбетовке арнайы сөз ұсынылды. Полковник өз кезегінде:

– Ішкі істер министрлігінің бастамасымен ағымдағы жылдың 16 қыркүйегінде еліміздің өңірлерінде ІІМ ҚР Ұлттық Ұланы ақпараттық насихаттау тобының республикалық туры басталды. Мұндағы басты мақсатымыз әскери қызметшілер мен аймақ азаматтарына ел Президентінің Жолдауын және еліміздің Тәуелсіздік жылдарындағы жетістіктерін насихаттау. Сондай-ақ, әскерилеріміз бен жастарымызды қазақстандық патриотизм және конституциялық борышқа адалдық рухында тәрбиелеу, Ішкі істер органдары мен Ұлттық Ұланның имиджін нығайту, отандастарымыздың әскери қызметшілерге, олардың қызметтік, жауынгерлік міндеттеріне оң көзқарасын қалыптастыру, – дей келе концерттік бағдарламаны тамашалауға шақырды.

Ұлттық Ұлан ән-би ансамблі ұжымы әскери билерімен, патриоттық әндерімен, музыкалық туындыларымен көрермендерге ерекше әсер сыйлап, қошеметке бөленді.

Мереке соңында Еңбекшіқазақ ауданы әкімінің орынбасары Бауыржан Бименов ауданымыздың атынан тыныштығымыздың сақшысы болып отырған Ұлттық Ұлан ұжымына зор алғыс білдіріп, еңбектеріне жеміс тіледі. Аудан әкімі Алтай Досумбаевтың атынан «Халық қаһарманы», Полковник Қайрат Үмбетовке және Ұлттық Ұланның ән-би ансамбліне Алғыс хат пен сый-сияпат табысталды. 

Ринат НАРХАНОВ.