Қазан айының  басындағы  мереке – Қарттар күнін ерекше атап өту жақсы дәстүрге айналған. Бұл күн құрметке лайық, даналықтары мол, ардақты жандарға арналған. Мереке қарсаңында, Тұманбай Молдағалиев атындағы аудандық мәдениет үйінде «Қарттарым – асыл қазынам» атты мерекелік концерт өтті.

Салтанатты шараға аудан әкімі А.Досумбаев, аудандық мәслихат хатшысы Б.Ахметов, аудан әкімінің орынбасарлары Б.Бименов пен  Қ.Ақшабаев, аудандық ардагерлер кеңесінің төрағасы Т.Ұзақов, «AMANAT» партиясы аудандық филалының Атқарушы хатшысы Б.Рахимов және ардагерлер қауымы қатысты. Ең алдымен, аудан  әкімі  мерекелік  шараға жиналған барша қауымды құттықтады. «Қазіргі таңда біздің мемлекетімізде қарттарға үлкен мән беріп, көңіл аударып, жан-жақты үкімет тарапынан қамқорлық жасалуда. Қазақстанның өсіп-өркендеуіне, еліміздің бейбітшілік пен тыныш  өмір кешуіне өз үлестерін қосқан осы ардақты да аяулы қарттарымыздың арқасы деп есептеймін. 1 қазан күні – саналы ғұмырларын Отан деп, тынымсыз еңбектерімен мемлекетіміздің негізін салуға жол ашқан алдыңғы буын аға-апаларымыздың төл мерекесі. Олардың өмір жолдары бүгінгі ұрпаққа табылмас қазына, үлгі, өнеге», – деді Алтай Машикұлы.

Аталған мерекелік шараға аудан қарияларының ішінен әр салада жемісті еңбек еткен 100-ге жуық ардагер қатысып, бірқатары ауданымыздың әлеуметтік-экономикалық, әсіресе қоғамдық-саяси өмірінің дамуына қосқан орасан зор үлестері үшін аудан әкімінің және аудандық ардагерлер кеңесінің алғыс хаттарымен марапатталды.

Мерекелік шарада мәдениет үйінің шығармашылық ұжымдарының өнері көрермендердің көңілінен шықты. Сонымен қоса, өнерпаз ардагерлерден құрам тапқан «Ақ әжелер» мен «Алтын адам»  ансамблдерінің өнерлері көрермендерге мерекелік әсер қалдырып, керемет көңіл-күй сыйлады. Мерекелік концерттен кейін аудан басшысы Ұлы Отан соғысы ардагерлері Солтанбай Жарықбасов, Жылқыбай Тажіқұловтың отбасына арнайы барып құттықтап, сый-сияпат тарту етті. «Ерлік – елге мұра, ұрпаққа үлгі» деген Алтай Досумбаев сұрапыл соғыстағы майдангерлердің көрсеткен жаужүрек ерліктеріне бүгінгі ұрпақ бас иетінін  жеткізді. Отан үшін кеудесін оққа тосып, бейбіт өмір сыйлаған қарт жауынгерлерге алғысын білдірді. Өз кезегінде қарттар да  қолын жайып, ақ батасын  берді.

Е.АСЫЛ.