Аудан әкімі Алтай Досумбаев өңіріміздегі құрылыс жұмыстары жүргізіліп жатқан бірқатар нысандарды аралап қайтты. Құрылыстың қай-қайсысы болса да сапалы әрі уақытылы атқарылуы керектігін айтып, ескертулер жасады.

Ең әуелі аудан әкімі Есік қаласындағы БМҚ (блокты-модульдік қазандықтар) жұмысының қарқынын тексерді. Бүгінгі таңда Есік қаласында 15 блокты-модульдік қазандықтың құрылысы жүргізілуде. Оның 4-уі аяқталып, пайдалануға берілді, қалғаны жыл соңына дейін аяқталатынын айтты «Жетісу Энерджи» ЖШС мердігерлік ұйымы. Осы ретте Шелек ауылында тағы бір БМҚ құрылысы жүргізілуде, ол да жаңа жылға дейін аяқталады. Ағымдағы жылы 79  көппәтерлі тұрғын үй орталық жылуға қосылмақ.            

Қай кезде болмасын ауыз судың сапалы болуы маңызды. Су – тіршілік көзі. Халық денсаулығының мықты болуы да таза ауыз судың сапасына байланысты. Жұртшылықтың талап-тілегі біреу. Ол ауыз судың сапалы әрі қолжетімді болуы. Бүгінде ауданымыздағы Көктөбе ауылдық округіндегі Қызылжар ауылын, Бәйдібек би ауылдық округін сумен қамту жүйесін қайта жаңғырту жұмыстары қарқынды жүруде. Айталық, Қызылжар ауылының сумен қамту жүйесін қайта жаңғырту жұмысына 24 адам тартылып, 6 техника жұмылдырылған. Жұмысқа мердігерлік еткен «Таир» ЖШС-і 17 дана құдық қазып, су құбырына қажетті 3700 метр полиэтилен құбырларын орнатып үлгерген.

Сонымен қоса, Қызылжар ауылында дәрігерлік амбулатория күрделі жөндеуден өтуде. Бюджеттен 377 млн теңге қаржы бөлінген. Күрделі жөндеу жұмысы жыл соңында аяқталып, тұрғындар игілігіне берілмек.

Бәйдібек би ауылының сумен қамту жүйесін қайта жаңғыртуда 44 адам жұмыспен қамтылып, 12 бірлік техника жұмылдырылған. Мердігер мекеме – «Алихан ойл З» ЖШС-і 7 дана құдық пен 2560 метр құбыр жолын қазып, 480 метр полиэтилен трубалар орнатқан. Биыл Шелек ауылындағы кәріз жүйесі қайтадан жаңартылуда. Қазір аталған елді мекенде кәріз қондырғысының алаңын түзету, қоршау жұмыстары жүргізілуде.

Сапар барысында Алтай Машикұлы Есік қаласы мен Шелек ауылындағы 60 пәтерлік тұрғын үйді абаттандыру жұмысын пысықтап, сондай-ақ, аудан орталығындағы 1500 орындық орта мектептің құрылысын да назардан тыс қалдырмады. Қазір Есік қаласындағы екі 60 пәтерлі, Шелек ауылындағы бір 60 пәтерлі тұрғын үйлердің құрылысы аяқталып, қабылдау актісіне қол қойылды. Жаңадан бой көтерген көпқабатты үйлер маңында абаттандыру жұмыстары қарқынды жүруде.

Есік қаласында 1500 орындық орта мектептің құрылыс-монтаж жұмыстары жүргізілуде. Мектеп құрылысы 2023 жыл 10 маусымында аяқталады деп  күтілуде. Алайда, аталған құрылыс жұмыстары жұмыс кестесінен 3 айға кешігіп келеді. Аудан басшысы мердігер мекеме «BI Global» ЖШС-не құрылыс жұмыстарын қарқынды жүргізуді және сапаға баса назар аударуды міндеттеді.

Шелек ауылдық округінде салынып жатқан дене шынықтыру-сауықтыру кешенінде сапарын түйіндеді. Жобаға сай қос қабатты кешен ғимаратында 180 орындық көрермендер залы, 18/12 метрлік жаттығу залы, 18/12 метрлік бокс залы, 18/15 метрлік күрес залы, әкімшілік және қосымша кабинеттер бой көтермек. Аталған кешен құрылысына бюджеттен 1 млрд 836 млн теңге көлемінде қаржы қарастырылған. Мердігер мекеме «СП НЕФТЬ» ЖШС-і кешен құрылысын мамыр айында бастағанымен, түрлі қаржылық қиындықтар мен материалдардың тапшылығы жұмыстың қарқынды жүруіне тұсау салған көрінеді. Қазір  аталған дене шынықтыру-сауықтыру кешенінің іргетасы мен жертөле жұмыстары аяқталып, қабырғалары қалана бастапты. Мердігер мекеме тиісті мәселелер оң шешімін тапса, құрылыс қарқынын тездететіндіктерін жеткізді. Аудан басшысы Алтай Досумбаев жаңадан салынған және күрделі жөндеуден өтіп жатқан нысандарды аралау барысында атқарылған құрылыс жұмыстарын саралап, сала басшыларына нақты тапсырмалар берді. Өңір басшысы әлеуметтің әлеуетіне қызмет ететін әр нысанға аса жауапкершілікпен қарау керектігін жеткізді.

Е.АСЫЛ.