Ұлт ұстазы, Алаш ардақтысы Ахмет Байтұрсынұлының өмірге келгеніне 150 жыл толуына және ұлы суреткер, қазақ әдебиетінің классигі Мұхтар Әуезовтің туғанына 125 жыл толуына орай «Еңбекшіқазақ» газетінің редакциясы ұйымдастырған «Алашқа айбын болған арыстар» атты әдеби байқау өз мәресіне жетті.
Әдеби байқауға Алаш елінің азаттығы мен ұлттың рухани бостандығы үшін күрескен ұлы тұлғалардың қайсар рухы мен өлмес мұраларын тебірене жырлаған, қайталанбас дарын иелерінің қадір-қасиетін қара сөзбен кестелеген 15-ке жуық шығарма келіп түскен болатын. Байқау талаптарына сай ойы өрелі прозалық шығармалар мен кестедей келісім тапқан поэзиялық туындылар үздік деп танылды. Әдеби аламанда, И.Саттаров атындағы орта мектептің оқушысы Анеля Мамежан топ жарса, Рахат орта мектебінің оқушысы Балауса Азаматқызы мен Көктөбе орта мектебінің оқушысы Аяла Сәрсенәлі ІІ орынды еншіледі. Бөлек батыр атындағы орта мектептің оқушысы Алтынай Ибрагим, А.Саттаров атындағы орта мектептің оқушысы Аяулым Айхожа мен Әл-Фараби атындағы орта мектептің оқушысы Балауса Нұрахмет үшінші орынға ие болды. Байқау жеңімпаздарына арнайы сыйлықтар мен мадақтама қағаздарын табыстаған газеттің бас редакторы Х.Ахметжанов өрімдей жасөспірімдердің өнерін жоғары бағалап, оларға шығармашылық табыс тіледі.

Е.АСЫЛ.