Қазақстан Республикасының 20 қарашада сайланған Президенті Қасым-Жомарт Тоқаев қолын Конституцияға қойып, халқына ант бергеннен кейін алғашқы Жарлығын ауылды жаңғыртуға арнайтынын айтқанда еліміздің шартарабындағы ауыл тұрғындарының жүрегіне үміт пен сенім ұялағаны анық.

Ауыл – ел бесігі ғана емес, рухани өміріміздің түп қазығы, қазақтығымыздың, ұлттық мінез-құлқымыздың, бай тіліміз бен өнеріміздің қайнар бұлағы. Ауыл – ел бесігі ғана емес, елімізді асырап-сақтаушы, құнарлы азық-түлік өндіріп, қала мен даланы табиғи таза тағамдармен қамтамасыз етуші еңбеккерлер мекені.

Менің сенетінім бұрнағы жылдарда тұрғындар қалаға қоныстануға ұмтылады деп урбанизацияға, яғни тұрғындардың қалаға көшіп кетуіне көндігу керек деген саясаткерлердің бағыты жүз пайыз бұрыс екенін өмірдің өзі дәлелдеп берді. Өтпелі кезеңде темір жол вокзалында тәшке сүйреп, саудагерлер тауарын тасығанда алатын екі жүз теңгеге өмір кешіп жүрген  атпалдай азамат жүк салған қапшықпен вагон бұрышына маңдайымды соққанда ашуға булығып: «Ала дорба тасып екі жүз теңгеге өмір кешкенше, ауылыңа оралып мал бақпайсың ба?!» – деп үлкендігіме басып, біраз «сыбап» алған едім. Сол жігіт бірде көлігім жарамай жолда қалғанымда мені танып, джиптен түсіп сәлем бергені есімнен кетпейді. «Сіз сол жолы пойыз вагонында жер-жебіріме жетіп ұрыспағанда, басқаша өмір кешер ме едім. Ауылға оралып, үш-төрт жігітпен бірлесіп, шаруа қожалығымен айналыстық – ет өндіреміз», – деді.

Айтпағым, Президент Жарлығына үкімет құжаттары мен жергілікті басшылардың қолдауымен ауылды биік деңгейге шығаруға ынталы азаматтар да, білікті мамандар да жетіп артылады. Іске сәт!

Хайролла АХМЕТЖАНОВ,

Алматы облысы, Еңбекшіқазақ ауданының құрметті азаматы.