Бүгін «халықтық» коалиция өкілі ретінде ел астанасындағы Тәуелсіздік сарайында өткен Қасым-Жомарт Тоқаевты ҚР Президенті ретінде ұлықтау рәсіміне қатыстым. Рәсім кезінде Орталық сайлау комиссиясы Қасым-Жомарт Тоқаевқа Қазақстан Республикасы Президентінің куәлігін тапсырды. Осыдан кейін Президент Қазақстан халқына ант берді.

«Қазақстан халқына адал қызмет етуге, Қазақстан Республикасының Конституциясы мен заңдарын қатаң сақтауға, азаматтардың құқықтары мен бостандықтарына кепілдік беруге, Қазақстан Республикасы Президентінің өзіме жүктелген мәртебелі міндетін адал атқаруға салтанатты түрде ант етемін!» – деді Қасым-Жомарт Кемелұлы. Президент өз сөзінде Қазақстан халқы үшін жаңа дәуірдің парағы ашылғандығын, енді елімізде түбегейлі жаңғыру болатындығын жеткізді. Иә, шындығы сол – тұтас әлемнің бір бөлшегі ретінде қазақ елі, түрлі бәсекелер мен алдағы сын-қатерлерге дайын болуымыз шарт. Еліміздегі барлық саяси күштер ел Президентінің маңына топтасып, отанымызды жаңа сипаттағы мемлекетке айналдырады деп сенеміз. Қасым-Жомарт Кемелұлы халықтың аманатына адал болатындығын баса айтты. Президенттің барлық бастамасына үн қосқан «AMANAT» партиясы да ел аманатына адал қызмет ете береді.

Бағдат РАХИМОВ,

«AMANAT» партиясы аудандық филиалының атқарушы хатшысы.