Рухани-мәдени байлығымызды ұрпақтан-ұрпаққа жеткізуші кітапхана болса, сол байлықты өз оқырманына таныстырушы тұлға, ол – кітапханашы. Яғни ұстаздан кейінгі құрметті мамандық иесі десе де болады. Өйткені олар өздерінің күнделікті еңбегімен әлемдік мәдениет пен ғылым құндылықтарына, шектеусіз ақпаратқа қол жеткізуді қамтамасыз ететін адам. Олар білімге деген ықыласты ынталандырып, мәдени дәстүрлерді одан әрі дамытуға үлес қосады. Сондықтан да кітапханашы киелі орданың құрметті маманы, мәртебелі иесі.
Кітапханашы деген құрметті мамандық иелерінің бірі – Адиша Кегенбаева. Адишаның әжесі Елтай, анасы Баянды да кезінде кітапханашы болса, сіңілісі Асел Кегенбаева да Шелектегі М.Мәметова атындағы орта мектебінде кітапханашы болып істейді. Қасиетті қазынамызды көздің қарашығындай сақтап, оны насихаттап, ел игілігіне жаратып жүрген Адиша Ерболқызы кішкентайынан кітапқұмар болып өсті. Кітапханадағы көп кітаптарға қызығып, кейін өскенде қалаған кітабымды оқитын кітапханашы апайлардай болсам деп армандайтын. Ақыры ол арманы да орындалды.
Адиша Кегенбаева 1983 жылы Қаратұрық ауылында дүниеге келіп, осы ауылдағы орта мектепті бітіріп, Қаскелең мәдени ағарту колледжіне оқуға түсті. Дипломмен ауылына оралған ол үш жылдай Қаратұрық ауылдық округі әкімдігінің аппаратында қызмет етті. 2009 жылдан бастап кітапханашылық мамандығы бойынша алты жыл Қаратұрық орта мектебінде, одан кейін Шелек модельді ауылдық кітапханасында, 2018 жылы Бәйтерек ауылдық кітапханасында кітапханашы болып жұмысын жалғастырды. 2023 жылдан қазіргі уақытқа дейін оқырмандарына Қаратұрық ауылдық кітапханасында қызмет көрсетіп келеді.
Қаратұрық ауылдық әкімдігі Ащысай ауылындағы бұрынғы кеңшар кеңсесіне қоныс аударғанда, босаған нысанды кітапхана етіп ашқан болатын. Сөйтіп, міне, өз ауылындағы кітапханаға Адиша ие болды. Жібек Жолының бойында орналасқан, жалпы ауданы 45 шаршы метр, үш бөлмелі кітапханада еңбек жолын одан әрі жалғастырды. Ескі ғимаратты ағымдағы жөндеуден өткізіп, қызметіне қызу кіріскен Адиша кітап қорын қазір 3 280-ге жеткізді. 563 тұрақты оқырманы болса, келушілер саны 5 мыңға жуықтаған.
Үш жылдан бері мерекелі, атаулы күндерден басқа республика, облыс, аудан, ауылға танымал тұлғалардың, ақын, жазулылар, ғалымдар мен басқа да кәсіп иелерінің мерей жасқа толу құрметіне орай кездесулер, пікірталас, әдеби кеш, тағы басқа да іс-шаралар өткізіп келеді. Әр шараға округке қарасты ауыл мектептерімен тығыз байланыс жасап, оқушыларды іс-шараларға тартып, білім деңгейінің өсуіне, өмірдің сан қилы кезеңдерін түсініп, сезінуге оң қөзқарасын қалыптастыруға ықпал етуде. Мысалға, желтоқсаншы, Ауған соғысы, Чернобль атом электр станциясының апатын залалдандыруға қатысқан, Семей атом полигонында қызмет еткен, басқа да түрлі қауіпті аумақтарда Отан алдындағы қызметтерін атқарған ардагерлермен кездесулер өткізеді.
Сонымен қатар, жергілікті ақын-жазушылармен кездесулер ұйымдастыруды да қолға алды. Атап айтқанда, таусүгірлік ақын Болат Үсенбаев, достықтық Анарбек Бердібаев, ауданызыздан шыққан ұйғыр ақыны Иминжан Тохтияров, ұйғыр балалар жазушысы Авут Масимов, жас талант иесі Тоқтарбек Жұмагелді, тағы басқалармен А.Бертаева атындағы, С.Аманжолов атындағы, Ш.Уәлиханов атындағы, М.Мәметова атындағы орта мектептермен тығыз байланыста болып, кездесулер, әдеби кештер, түрлі іс-шаралар өткізуде. Үш баланың анасы атанған Адиша Ерболқызы осындай еңбектері еленіп, халықаралық, облыстық аудандық, ауылдық деңгейдегі Алғыс хаттар, Құрмет грамоталарымен марапатталған.
Оқырмандардың білімге деген сүйіспеншілігін арттырып, адамгершіліке тәрбиелеп, олардың ой-өрістерінің жан-жақты дамуына үлес қосып жүрген Адишадай кітапхана мамандары әрқашан да киелі орданың мәртебелі иесі болып қала бермек.
Анарбек МӨКІШҰЛЫ.
