Елдігіміздің шаңырағы шайқалуға шақ қалған Қаңтар оқиғасына да 1 жыл толды. Аталған сындарлы сәт отандастарымызды үрей мен алаңға салғаны белгілі. Осы оқиғаның мән-жайына тоқталып, ел алдында қорытындысын баяндау үшін бүгін тікелей эфирде Парламенттің жалпы отырысы өткізілді.
Алғашқы болып сөз алған ҚР Бас прокуроры Асылов Берік Ноғайұлы: – Қаңтар оқиғасы бүкіл елді дүр сілкіндірген, бәрімізге үлкен сын болды. Бүгін соның нақты ақпараты мен заңды бағасын беру үшін бас қостық. Тергеу орындары хронологиясы негізгі айыптыларды анықтады. Олардың ішінде жоғары лауазымды адамдар мен ұйымдасқан қылмыстық топ мүшелері де болды. Оқиғаның қалай ұйымдастырылғаны мен қайтыс болған азаматтардың кім екені зерттелді. Бұл жүмыс үздіксіз жалғастырылуда, қылмыскерлер жауапқа тартылуда, – дей келе өз баяндамасында барша деректерді бүркемесіз жеткізді.
Үлкен қауіптің бетін қайтару жолында ел Президенті Қасым-Жомарт Тоқаевтың тиімді шаралары, ел іргесін аман сақтап қалу үшін орасан үлесін қосты деп білеміз.
Қымбатты отандастар! «Бұдан былай басты құндылығымыз Тәуелсіздігіміздің тағдырына қауіп төнбесе екен» деген тілек-арманымыз бар. Аумалы-төкпелі, геосаяси жағдайлар өршіп тұрған заманда Отанымызға адал қызмет етіп, бірлігімізді нығайтудан жаңылмайық!

Асыл БАЙТУЛАҚОВ,

«Аманат» партиясы Еңбекшіқазақ аудандық филиалы жанындағы партиялық бақылау коммисиясының төрағасы.