Тәуелсіздік – Қазақстан халқының ең асыл құндылығы. Егенмендігіміздің арқасында экономикалық және әлеуметтік жағдайымыз айтарлықтай жақсарып, мемлекетіміз демократиялық оң өзгерістерге қадам басып, толағай табыстарға қол жеткізді.

Тәуелсіз Қазақстанның төл перзенттері осы бір заманымыздың жаңа келбетін кескіндеп, бабалардың асқақ армандарын арқалап өмір сүріп келеді.

Еліміз Тәуелсіздігіміздің іргесін қалағалы Отан қорғаушылар қылмыспен күресуде, азаматтардың конституциялық құқығын қорғауда, мемлекетіміздің тыныштығын сақтауда өздерінің тіректі күш екенін әйгіледі.

Осыдан 31 жыл бұрын Тәуелсіз Қазақстанның қорғаныс саласының айшықты нышандарының бірі ретінде «Ұлттық ұлан» құрылды. 1992 жылы 10 қаңтарда ҚР Тұңғыш Президенті Ұлттық ұланды құру туралы жарлыққа қол қойған болатын. Осылайша Ұлттық ұлан тарихының жаңа парағы ашылған еді.  Сол сәттен бастап ауданымыздағы Қаракемер ауылында орналасқан Ұлттық ұлан 6654 әскери бөлімі Отанға адал қызмет атқаруда. Әскери бөліміміз жоғары деңгейде әскери дайындықтар жүргізіп, егемен елдің қорғаныс саласына білікті кадрлар дайындап келеді. Сөзіміздің бір дәлелі – 1 жыл бұрынғы қаңтар оқиғасында Ұлттық ұлан 6654 әскери бөлімінің жауынгерлері ел тұтастығын сақтап қалу үшін жан аямай күресіп, өз міндеттерін абыроймен атқарды.

Осынау айтулы күнде барша әскери саладағы ардагерлерді, қызметкерлерді, Ұлттық ұланымызды кәсіби мерекелерімен шын жүректен құттықтағым келеді. Баршаңызға зор денсаулық, отбасыларыңызға амандық, бақыт-береке тілеймін! Қиын да күрделі саладағы еңбектеріңіз жемісті болсын! Бар әлемге, Тәуелсіз Қазақстанымызға бейбітшілік тұрақтасын!

Жандос ҚАСЫМОВ,

ҚР Ұлттық ұлан 6654 әскери бөлімінің командирі, полковник.