Екібастұздағы төтенше жағдай кезінде «AMANAT» партиясының мүшелері мен белсенділері алғашқы күннен бастап қала тұрғындарына гуманитарлық көмек таратуға атсалысқан болатын. Тұрғындарға жылытқыштар, жылы көрпелер, қажетті заттар таратылды. Аманаттықтар аталған көмекпен шектеліп қалмай, балалардың қысқы демалысын ұйымдастырды. Осылайша, 30 оқушыдан тұратын топ қысқы демалыс кезінде  бір аптаға жуық уақытын  ауданымыздың «Тау-Жаңашар» балалар лагерінде өткізді.

Партиялықтар оларға арнап тартымды да қызықты бағдарлама ұйымдастырды. Бағдарлама аясында спорттық жарыстар, тауға сапар, музейлерге экскурсия жасалды. Алатаудың баурайында, әсем табиғаттың аясында демалған екібастұздық оқушыларды  «AMANAT» партиясы Алматы облыстық филиалының төрағасы Қуат Байғоджаев Жаңа жыл мерекесімен құттықтап, әртүрлі сыйлықтар табыс етті. Қуат Сұлтанұлы балалармен бірге еріп жүрген тәрбиешілер мен медицина қызметкерлеріне де алғыс білдірді.

– Екібастұздан келген мектеп оқушыларының демалысы кезінде облысымызға қарасты аудандардағы «AMANAT» партиясының қызметкерлері балалардың хал-жайын біліп, оларға бағалы сыйлықтар тарту етті. Сонымен бірге, әр деңгейдегі мәслихат депутаттары мектеп оқушыларының ойдағыдай демалуына 1 млн 600 мың теңге көлемінде қаржылай көмек көрсетті, – дейді «AMANAT» партиясы аудандық филиалының төрағасы Бағдат Рахимов. «Қаракемер балалар театры» қойған белгілі режиссер Қадыр Жетпісбаевтың «Бала мерген» атты пьесасы да Екібастұздан келген балдырғандардың көңілінен шықты. «Алтын адам табылған жерге алғаш рет келіп отырмын. Маған бәрі ұнады. Таулар да өте әдемі. Демалысымыз шынымен де көңілді өтіп жатыр. Табиғаты әсем, тарихқа бай бұл өңірге тағы да келуді армандаймын», – деп атап өтті Диляра Бақытбекова есімді оқушы.

Е.АСЫЛ.