Жаңа жыл кірісімен аудан аумағында ақ түтек боран күшіне мінді. Қаңтардың 3-де басталған бұрқасын бара-бара күшейіп, өткен аптаның сейсенбі мен сәрсенбі күндері көптеген көлік тау ішінде қар құрсауында қалып қойды. Аудан әкімі Алтай Досумбаев жолдарды тазалауда, сондай-ақ жолаушылардың қауіпсіздігін қамтамасыз ету жұмысында ерен еңбек сіңірген «ДСУ-13» АҚ-ның бульдозер жүргізушісі Сергей Гормашовқа арнайы алғыс хат пен 300 мың теңге ақшалай сыйлықтың сертификатын табыстады. Сонымен қоса, «ДСУ-13» АҚ-ның механигі Ринат Ғалиевқа да аудан әкімінің алғыс хаты берілді.
– Табиғаттың қаталдығына қайсарлық танытып, адам өмірін құтқарған жандардың ерлігі мадақтауға лайық. Мен өз атымнан сіздерге және барлық құтқару қызметіне қатысқан қызметкерлер мен еріктілерге айрықша алғыс айтамын, – деді аудан басшысы.
Е.АСЫЛ.
