Бүгін Астана қаласында өткен «AMANAT» партиясының кезектен тыс XXV съезінде делегат болып қатыстым. Ауқымды шараға еліміздің барлық өңірінен 2000-нан астам адам жиналды. Олардың қатарында Саяси кеңес мүшелері, Мәжілістің VII шақырылым депутаттары, өңірлерден келген делегаттар, партияның «Жастар Рухы» жастар қанатының мүшелері, сондай-ақ сарапшылар, үкіметтік емес ұйымдардың, бұқаралық ақпарат құралдарының өкілдері бар.
Кезектен тыс XXV съездің күн тәртібінде 3 мәселе қаралып, партиялық тізімдер және бірмандаттық аумақтық сайлау округтері бойынша сайланатын Қазақстан Республикасы Парламенті Мәжілісінің депутаттығына кандидаттардың тізімі бекітілді. Өңірімізден бірмандаттық аумақтық сайлау округі бойынша Абитов Ерік Әзілжанұлы мен Давлетов Сыдық Әбуұлының кандидатуралары ұсынылды.
Жалпы 19 наурыз күні өтетін ҚР Мәжілісі мен барлық деңгейдегі мәслихат сайлауы 2022 жылы 5 маусым күні жалпыұлттық Референдумда сайлау заңына енгізілген өзгертулер мен толықтыруларға сай жаңа мажоритарлық әдіспен өтеді. Барлық кандидаттарға сәттілік тілей отырып алдағы сайлау тартысты өтеді деген сенімдемін.
Бағдат РАХИМОВ.
«AMANAT» партиясы Еңбекшіқазақ аудандық филиалының атқарушы хатшысы.