Қолға алған кәсібін одан әрі дамытып, бастаған істің аяқсыз қалмауын қадағалап, әр ісіне тыңғылықты қарап, кәсібін нәсіп етіп отырған кәсіпкер әйелдер біздің ауданда да жетерлік. Солардың бірі – Күлшат Ысқақова. Халықаралық әйелдер мерекесіне орай талай иіглікті істерге ұйтқы бола білген  кәсіпкермен аз-кем сұхбаттасқан едік.

–  Күлшат Торғайбайқызы, әңгімеден бұрын сізді келе жатқан халықаралық әйелдер күнімен құттықтаймын!

– Рахмет! Мен де әрбір іскер әйелге көктемнің шуақты күнімен қатар келген мерекеде отбасылық бақыт, бизнесте бастаған қадамдары нық болып, талаптары табысты болсын деп тілек білдіремін.

– Күлшат  ханым, бизнеске қалай келдіңіз? Алғашқы қиындықтарды қалай еңсере білдіңіз?

– Мен негізі қаржы саласының маманымын. 1988-1995 жылдар аралығында банк саласында қызмет атқардым. 1997 жылдан бастап Есік қаласында оқу-құралдары мен кеңсе тауаларын сататын дүкен аша бастадым. Ол кезде тауар тапшы еді. Тіпті, сонау Мәскеуден әкеліп сатқан кездеріміз болды. Әрине, қиындықтар көп болды, соның барлығын еңсеруге күш салдым. Ал 2001 жылдан жеке кәсіпкер ретінде тіркелдім. Ия, өзіндік қиындықтары  бар болғанымен, қызық жұмыс. Күнде неше  түрлі адамдармен байланысқа түсесің. Бір қарасаң күлкілі, бірақ жылағың келетін кездер де болады. Енді бәрін түсіндіріп болсаң, бір сұрағын екінші рет қойып қайта сұрайтын кісілер болады.  Олардың бәрінің көңілін тауып, риза қылу да – үлкен өнер. Жалпы, бизнес мені тәрбиелеп келе жатқан үлкен мектеп деп айтсам болады. Міне солай, мүкіндігінше бизнеспен айналысып келемін. Қазір «Алина» сауда үйі мен «Ассы-ломбард» компаниясына иелік етемін. Бүгінде  13 адамды тұрақты жұмыспен қамтып отырмын.

– Қаншалықты өзіңізді жетілдірумен айналысасыз? Тұралап қалмау үшін үздіксіз шабытты қайдан алуға болады?

– Адамды адам еткен – еңбек дейді ғой. Қаржылық сауаттылықты арттыру туралы кітаптарды жиі оқимын. Ал, мотивация деген дүние біреуден не бірнәрседен алынбайды. Жәй ғана еңбек ету керек, еңбек ету керек. «Алма піс, аузыма түс» деп жатқаннан ештеңе өнбейтінін түсіну қажет. Мемлекеттік қызметте 8-10 сағат жұмыс істесең, өзіңнің ісіңде 16 сағаттан көп жұмыс істейсің. 24 сағат басың ойдан босамайды. Бұл формада жүруге үлкен көмек, үнемі  әрекет ете берген адам жалқаулануға ынтасы да болмай қалады. Қазіргі нарық заманы – отбасын да, мансап жолын да қатар алып жүретін іскер әйел болуды талап етеді.

– Түрлі әлеуметтік жобаларға қолдау көрсетіп, қайырымдылық шараларына қолұшын бересіз бе?

– Қайырымдылық жасау тек қаржылық мүмкіндіктерге ғана байланысты емес, ең бастысы мейірімді жүрегің мен таза ниетің болу керек. Біз қашан да көмек сұраған жандарға қолұшын беріп келеміз. Жыл сайын дәстүрлі «Мектепке жол» акциясы аясында ондаған мектеп оқушысына тегін оқу құралдарын береміз.

– Әңгімеңізге рахмет! Мерекеңіз құтты болсын!

Сұхабаттасқан Е.АСЫЛ.