Нәзік жандылардың мерекесі қарсаңында спорттың «Садақ ату» түрімен шұғылданатын, ауданымыздың атын байрақты додаларда шығарып жүрген Медина Мұратты тілдесуге шақырдық.

– Құрметті Медина Маденқызы, спортпен қай уақыттан бері шұғылданасыз?

– Мен 11 жасымда спорттық мектепке қабылдандым. Ол жерде волейболмен 2 жыл шұғылдандым. Содан кейін «Садақ ату» спорты мені қатты қызықтырды. Аталған спортпен айналысқаныма 4 жылдан асты. Осы аралықта мен облыстық, республикалық жарыстардың бірнеше дүркін чемпионы атандым және Франция мемлекетінде өткен әлемдік гимназиадаға қатыстым. Бүгінгі таңда ҚР спорт шеберімін, ендігі мақсат – халықаралық дәрежедегі спорт шебері атану.

– Садақ ату спорты сізді несімен қызықтырды?

– Бұл спорттың ерекшелігі – командалық топпен және жеке өнер көрсетуге болады. Адам бойына жауынгерлік рух сыйлай отырып, үнемі өз-өзіңмен күресуді талап етеді. Сондай-ақ бұл спортта дене жарақатын алу қауіптілігі төмен, ашық аспан астында ата-бабаларымыздың қаруын қолданып, нысанамызды көздейміз. Садақ ату жарыстарында адамның жасына шектеу қойылмаған. Адам бойындағы төзімділік, жауапкершілікті дамытатын спорт ерік-жігерді де күшейтеді. 

– Садақ ата-бабаларымыздың бес қаруының бірі болғандықтан, біздің жастарымыздың оған қызығушылығы жоғары шығар. Елімізде садақ атудың даму қарқыны қалай?

– Дұрыс айтасыз, әр барған жарысымда жастарды көптеп кезіктірем. Олардың арасында болашақ чемпиондар көп деп санаймын. Садақ атуға қызығатын жастар саны артып келеді, даму қарқыны өте жоғары. Жауынгер халықтың ұрпағы болғандықтан бұны заңды құбылыс деп ойлаймын.

– Алға қойған мақсаттарыңызбен бөлісіп өтсеңіз.

– Кез келген спортшы секілді менің де қазіргі таңдағы басты арманым – әлемдік олимпиадалық ойындарға қатысып, шыңнан көріну. Айналысып жүрген спортымды жалғастыра отырып, жақындарымды жеңісті күндеріммен қуантқым келеді. Спорттық мансабымда арманымның шыңдарын бағындырсам деймін. Ол үшін сол жолда аянбай еңбектену қажеттігін де ұмытпаймын. Еңбексіз жетістік жоқ.

– Сұхбатыңызға рахмет. Сізге сәттілік тілейміз! Алдағы келе жатқан мерекемен құттықтаймыз!

Тілдескен Ринат НАРХАНОВ.