Бүгін Парламент палаталарының бірлескен отырысы өтіп, жиынға Мемлекет басшысы Қасым-Жомарт Тоқаев қатысып, жаңа сайланған депутаттардың ел игілігі үшін жұмыс жасайтынына сенім білдірді. Сонымен қатар, халық қалаулылары саяси реформаларды жүзеге асыруға, халықтың әл-ауқатын арттыруға, мемлекетті дамытуға барын салу керектігін атап өтті.

Рас, бұл сайлау бұрынғыдан өзгешерек болды. Ел үшін еңбек етуге мүдделі азаматтар өздерінің кандидатураларын ұсынып, жұртшылықтың қолдауына ие болғандар жеңіске жетті. Ендігі міндет – ел артқан сенімнің үдесінен шығу.

Парламент пен мәслихаттарды партиялық тізім мен бір мандатты округ бойынша жасақтаудың тың тәсілдері іске қосылды. Бұл тәсілдің енгізілетіні туралы Президент өз Жолдауында айтқан болатын.

Партиялар арасындағы бәсекелестік елдегі саяси жүйенің күшеюіне серпін берсе, өзін-өзі ұсынушыларға да осындай мүмкіндіктің берілуі ел ішінен халқының игілігі үшін жұмыс істеуге мүдделі азаматтардың көптеп шығуына мұрындық болды. Демек, елінің ертеңі үшін еңбек етуге бейілді ұлтжанды, жанашыр азаматтардың саны арта бермек бұдан былай. Алда болатын сайлауларда да бағын сынап көру үшін олар қазірден бастап елдің сеніміне ие болуға, сол үшін халықтың проблемаларын барынша көтеруге тырысатын болады. Бұл да жаңа реформаның, әділетті, демократиялы жаңа Қазақстанның саяси, әлеуметтік, экономикалық жаңғыруының жемісі.

Осындай бәсекелестіктің нәтижесінде, өздерінің сайлауалды бағдарламалары арқылы тұрғындардың көңілінен шыққан 28 депутат аудандық мәслихатқа сайланды. Алдағы уақытта ауданымызды дамытуға бағытталған тың идеялар болары сөзсіз. Себебі, мәслихатқа түрлі сала өкілдері мен жетекшілері сайланып, өңірді дамытуға бағытталған шараларды жүйелі жалғастыруға зор мүмкіндік туып отыр. Білім беру, фармацевтика салалары мен кәсіпкер, журналист, құрылысшы, ауылшаруашылығы, өндіріс, мәдениет саласының өкілдері халық қалаулысы атанды.

Елім дейтін, жұрт қамын жейтін асыл азаматтардың ел ішінен шығатыны белгілі. Осыны ескерген Қ. Тоқаев өзінің саяси реформаларында қарапайым азаматтардың саяси билік басына келуіне жағдай жасады. Ол үшін сайлау жүйесіне айтарлықтай өзгерістер енгізілді.

Биылғы сайлаудың нәтижесінде мәжілістің жаңа құрамы жетпіс пайызға жаңарды. Демек, жаңаша ойлайтын, елдегі мәселелерді жаңаша көре білетін және жаңаша көзқараспен шеше білетін азаматтар билік басына келді. Оның ішінде жалынды жастар да баршылық. Демек, еліміздің саяси жүйесі барынша жаңарып, жаңғырғанын білдіреді бұл көрсеткіш. Әрі түрлі партия өкілдерінің сайлануы халықтың мұң-мұқтажын ескеріп, елеулі мәселелерін шешуде пікір алуандығы мен жан-жақты тәсілдердің барынша қамтылатынын көрсетеді.

Бекет АХМЕТОВ,

Еңбекшіқазақ аудандық мәслихат депутаты.