Бүгін Парламент палаталарының бірлескен отырысында Президент Қасым-Жомарт Тоқаев депутаттарды құттықтап, өз сөзінде: «Өздеріңізге дауыс берген азаматтар үлкен үміт күтіп, сенім артып отыр. Депутаттар билік пен қоғамның әріптестігін нығайтуға үлес қосуы қажет. Бұл жұмыс «Халық үніне құлақ асатын мемлекет» тұжырымдамасын орнықтыруға септігін тигізеді» – деп, сайлауда жеңіске жеткен «AMANAT» партиясы осы жұмысқа белсене атсалысып, алдағы өзгерістердің бел ортасында болатындығына үлкен сенім білдірді.
Сонымен қатар, Мемлекет басшысы «Күшті Президент – ықпалды Парламент – есеп беретін Үкімет» тұжырымдамасына сай, Премьер-Министрдің кандидатурасын сайлауда жеңіске жеткен партия Мемлекет басшысына ұсынуға құқылы деді. Осы ретте саяси жауапкершілік «АМАNАТ» партиясына жүктелетінін жеткізді. Сондай-ақ, саяси партиялардың кадрлық резервін жасақтауды ұсыну арқылы, болашақта Үкіметтегі және аймақтардағы басшылық қызметтерге түрлі партия өкілдері тартылатындығы жайлы бөлісті.
Жариялылық, демократиялық, ашықтық, бәсекелестік. Бұл сөздерді сан жылдардан бері естіп келе жатқанымызбен, нақты іс жүзінде қалай іске асатынына соңғы уақыттардан бері ғана куәміз. Өйткені, Президенттің жаңа Қазақстан құру тұжырымы оны нақты іс жүзіне асыру мүмкін екенін көрсетті. Мемлекет басшысы ұсынған реформаларда өркениетті қоғам мен демократиялы мемлекет құрудың барлық озық үлгілері үйлесім тапқан. Осы наурызда өткен Парламент мәжілісі мен барлық деңгейдегі мәслихаттар депутаттарының сайлауы соның көрінісі болды. Сайлауда халықтың қатаң сараптауынан өткендеренді өздерінің пәрменділігі мен елді дамыту жолындағы қажыр-қайратын барынша көрсетуі тиіс.

Б.РАХИМОВ,
«AMANAT» партиясы Еңбекшіқазақ аудандық филиалының төрағасы.