2023 жылдың 30 наурызында өткен аудандық мәслихаттың бірінші сессиясында мәслихат төрағасы лауазымына Ахметов Бекет Төлегенұлы ұсынылып, «Қазақстан Республикасындағы жергілікті мемлекеттік басқару және өзін өзі басқару туралы» Қазақстан Республикасы Заңының 19-бабының 1-тармағына сәйкес, депутаттар қолдау көрсетіп, ашық дауыс беру арқылы бірауыздан сайлады.

Ахметов Бекет Төлегенұлы 1961 жылы 4 қарашада Еңбекшіқазақ ауданы, Қазатком ауылында көпбалалы отбасында дүниеге келген.

Жоғары білімді, 1986 жылы Қазақтың дене тәрбиесі институтын «Дене тәрбиесі және бұқаралық жұмыстар мен туризмді ұйымдастырушы» мамандығы бойынша, 2006 жылы Экономика және құқық академиясын «Қаржы экономист» мамандығы бойынша тәмамдаған.

Алғашқы еңбек жолын 1980 жылы «Транссельхозхимия» автокөлік кәсіпорынында қарапайым дәнекерлеуші ретінде бастаған. Кейіннен мұғалім, директордың орынбасары, А.Бубенцов және Абылай хан атындағы орта мектептердің директоры, Еңбекшіқазақ ауданының білім бөлімінің бастығы, аудан әкімінің кеңесшісі, аудан әкімінің орынбасары лауазымдарында қызмет атқарды.

VІ және VІІ шақырылған Еңбекшіқазақ аудандық мәслихаттың депутаты және мәслихат хатшысы болып сайланып, өз міндетін абыроймен атқарды. 40 жылдан астам уақыт бойы еңбек етіп, ауданымыздың дамуына өзіндік үлесін қосып келе жатыр.

Жүріп өткен еңбек жолында жеткен жетістіктері мен өңіріміздің дамуына қосқан үлесі үшін «Қазақстан Республикасы білім беру ісінің үздігі», «Ыбырай Алтынсарин атындағы» төсбелігілерімен, «Ерен еңбегі үшін» медалімен, «Парасат» орденімен марапатталған. Еңбекшіқазақ ауданының құрметті азаматы.

Бүгінде өркен жайған алып бәйтеректей үлкен бір әулеттің отағасы, ақылшы тірегі, арқа сүйері ретінде 6 бала тәрбиелеп, ұлын ұяға, қызын қияға қондырған ардақты әке.