«Халық үніне құлақ асатын мемлекет» тұжырымдамасын жүзеге асыру үшін тұрғындармен тығыз қарым-қатынас орнату өте маңызды. Мұны дұрыс түсініп, елмен етене араласа білген мәслихат депутаттары бұған дейін де өздерінің округтерінде қоғамдық жұмыстарға белсенді араласып, азаматтарға барынша демеу болып, қызмет етіп жүрген саланың тасын өрге домалатып, бар күш-қайратын арнап жүр деп сеніммен айтуға болады. Ендігі кезекте, артқан сенімді арқалап, Еңбекшіқазақ аудандық мәслихаттың төрағасы Бекет Ахметов пен сегізінші шақырылымының депутаттары қоғамдық бастамадағы өз өкілеттіктерін жүзеге асыру үшін ілкімді істердің тамырына бойлап, білек сыбана еңбек ету үшін алғашқы жұмыстарын әрбір ауылдық округ аумағында тұрғындармен кездесуден бастады.
Еңбекшіқазақ аудандық мәслихаттың сегізінші шақырылым депутаттарының жұмысы алдағы бес жылда жергілікті атқарушы органдармен бірлесе отырып әрбір депутаттың сайлауалды бағдарламасында айтылған және тұрғындардан түскен ұсыныстар мен сын-ескертулер негізінде оң нәтижеге қол жеткізуге негізделген. Сондықтан кездесу барысында негізгі күн тәртібіне сәйкес әрбір ауылдық округ аумағынан сайланған депутаттар алдағы жоспарларымен бөлісіп, туындап отырған негізгі мәселелерді талқылап, тұрғындардың ұсыныстарына құлақ асты.
Басқосуларда тұрғындар тарапынан әлеуметтік тұрғыдан аса маңызды мәселелер көтерілді. Айталық, жаңа мектептер мен дәрігерлік амбулаторияларды, мәдени нысандарды салу денсаулық сақтау және білім беру, мемлекеттік қызмет көрсету сапасын жақсарту, ескірген және бейімделген, үш ауысымды мектептердің мәселесін шешу, әлеуметтік нысандарды жаңартып, олардың материалдық-техникалық базасын нығайту, ауылдарды абаттандыру және бөлінген қаражатты нысаналы, тиімді игеру, жергілікті қауымдастықтың рөлін арттыру, сапалы ауызсумен, жолдармен, жарықпен қамтамасыз ету мақсатында елді мекендердегі инфрақұрылымдарды жаңарту, жайылымдық жер тапшылығының мәселесін шешу мен нысаналы мақсатта пайдаланылмай жатқан жерлерді мемлекет меншігіне қайтару, жергілікті атқарушы орагандардың мемлекеттік саясатты орындауда жауапкершілігін арттыру сияқты түйіткілді мәселелерді тиісті құзырлы органдарға жеткізе отырып, аталған мәселелердің оң шешімін табуға назар аудару маңыздылығы ескертілді.
Осы мақсатта мәслихат депутаттарынан құралған жұмыс тобының іссапары барысында анықталған түйіткілді мәселелерге талдау жасап, тиісті мекемелерге жүйелендірілген депутаттық сауал жолдауды және аудан әкімінің, құзырлы атқарушы орган басшыларының есептерін тыңдап, атқарылған жұмыстар бойынша нақты ұсыныстар жасау күн тәртібіне енгізілді.
Қазіргі таңда жұмыс тобының іссапар барысы бойынша қорытынды хаттамасы мен аудандық мәслихаттың ақпараттық баяндамасы пысықталып, депутаттық сауал дайындалуда.
Сардарбек НҰРАДИН.
