«Есік» мемлекеттік тарихи-мәдени музей-қорығында 18 сәуір Халықаралық ескерткіштер мен тарихи орындарды қорғау күніне  арналған ауқымды мерекелік іс-шара өтті.

Айтулы мерекеге орай Жамбыл облысы әкімдігінің мәдениет, архивтер және құжаттама басқармасына қарасты «Жамбыл облыстық тарихи-өлкетану музейінің» КМҚК «Тарихы терең Тараз» атты көрмесі ұйымдастырылды.

Көрмеде Жамбыл облысындағы Берікқара шатқалы, Жетітөбе обалары сынды ескерткіштері туралы мәлімет беретін археологиялық қазба жұмыстарының нәтижесінде табылған қола және ерте темір кезеңдеріне тиесілі алтын әшекейлер мен жауынгердің қоладан жасалған дулығасы, ақинақ семсері, найза мен жебе ұштары, қола қазандықтар, жануарлардың қола мүсіндері, түркі дәуіріне жататын Талас жазулары, ортағасырлық Тараз қаласының тарихын баяндайтын: түркі, қараханид, моңғол, саманид теңгелерінің айналымда болған ең құнды  топтамалары, ортағасырлық тұрмыста түрлі мақсатта қолданылған қыш ыдыстар: үлкенді-кішілі шырағдандар, хош иісті әтірлерді, дәрілік заттарды, сынаптарды сақтайтын жұмыртастар, Айша бибі кесенесінің түпнұсқа кірпіштері, майшамдар және т.б. бірегей экспонаттары  қойылды. Экспозициямен Жамбыл облыстық тарихи-өлкетану музейінің қызметкері Жансая Сембекова таныстырып, құнды тарихи жәдігерлер туралы жан-жақты мағлұмат берді.

Сонымен қатар мерекелік іс-шара аясында 2022 жылы «Есік» музей-қорығына белсенді әріптестік орнатқан музей достарымен (БАҚ, турфирма, мәдениет саласының өкілдері, ұстаздар мен демеушілер) кездесу ұйымдастырылып, оларға музей ісіне қосқан үлесі үшін арнайы марапаттар табысталды.

Іс-шара барысында «Есік» мемлекеттік тарихи-мәдени музей-қорығының директоры Гүлмира Мұхтарова мен Жамбыл облыстық тарихи-өлкетану музейінің директоры Сейтжан Ілияс екі мекеме арасында ғылыми, мәдени шығармашылықты нығайтуға және ұлттың мәдени және жазба мұрасын сақтау саласында өзара ынтымақтастық орнату мақсатында меморандумға қол қойды.

Жылдағы дәстүр бойынша музей ауласын абаттандыру шарасы жалғасын тауып, биылғы жылы Көкеновтер әулетінің демеушілігімен 5 түп шырша, 20 түп раушан гүлі музей ауласына егілді.

Мерекелік шара концерттік бағдарламамен жалғасын тауып, келген қонақтарға Наурыз дастарханы жайылды. 

Е.АСЫЛ.