Күні кеше Елордада басталған Қазақстан халықтары Ассамблеясының XXXII сессиясы бүгінде жалғасын табуда. Сессияның алғашқы күні Ассамблея делегаттарының пікірталастарымен өткен болатын.

Ашық талқылауларға Президент Әкімшілігінің басшылығы, орталық және жергілікті атқарушы органдардың басшылары, Парламент депутаттары, ҚХА мүшелері, республикалық және облыстық этномәдени бірлестіктердің төрағалары, діни бірлестіктердің өкілдері, ғылыми қызметкерлер, шығармашылық интеллигенция, қазақстандық және шетелдік БАҚ өкілдерінен барлығы 1000-нан аса адам қатысты.

Панельдік талқылауды ашқан Қазақстан Республикасы Президенті Әкімшілігі Басшысының орынбасары А.Балаева:  «Өткен жыл реформалар жылы болды және олардың табысты жүзеге асуына, атап айтқанда, ішкі саяси тұрақтылық пен бірлікті сақтау мен нығайтуға Ассамблеяның барлық институттары, бүгінде де өз үлесін қосуда», – деп Ассамблея жұмысына оң баға беріп, сондай-ақ, ел егемендігін сақтау – барша қазақстандықтың ортақ міндеті екенін баса айтты.

Бұдан кейін ҚР Парламенті Мәжілісі Төрағасының орынбасары Альберт Рау, ҚР Білім министрі Ғани Бейсембаев этносаралық толеранттылықты қалыптастырудың маңыздылығына тоқталса, Қазақстан корейлері қауымдастығының төрағасы Юрий Шин мен «Вайнах» Қазақстан шешендері мен ингуштар қауымдастығының төрағасы Ахмед Мурадов өз сөздерінде Ассамблеяның қоғамдағы рөлін, этносаралық қатынастарда мемлекет пен қоғамның азаматтық институттары арасындағы өзара іс-қимылдың тиімділігін арттыру – басты міндет екенін атап өтті.

Сессияға қатысқан барлық делегаттар пікірталастарда белсенділік танытып, рухани-адамгершілік, азаматтық құндылықтарды қалыптастырудың, әлеуметтік өзара іс-қимыл мен оң этносаралық коммуникациялардың өзекті мәселелерін көтерді.