Жеңіс туы желбіреген кездерде,

Қуаныштың жасы үйірілді көздерге.

Отан үшін отқа түскен аянбай,

Батырлардың рухы мұра біздерге.

Иә, қан майданда қасық қаны қалғанша жаумен алысып, жеңіс сыйлаған батыр ардагерлердің есімі ешқашан ұмытылмақ емес. Жеңіс жолында құрбан болып, бүгінгі ұрпаққа бейбіт күн сыйлаған Ұлы Отан соғысының ардагерлері қашан да құрметке лайық. Осы орайда 9 мамыр күні Есік қаласындағы Ұлы Отан соғысының ардагерлеріне арналған ескерткіш маңында мерекелік шара ұйымдастырылды.

Аудан әкімі Алтай Досумбаев, мәслихат төрағасы Бекет Ахметов, мәслихат депутаттары және қала тұрғындары ескерткішке гүл шоқтарын қойып, құрбан болған ардагерлерді бір минуттық үнсіздікпен еске алды. Сонымен қатар, биыл Ауған соғысының аяқталғанына 38 жыл толды. Осыған орай, ауған соғысының ардагерлеріне арналған ескерткіш ашылып, гүл шоқтары қойылды.

Аудан әкімі Алтай Машикұлы оқ пен оттың ортасынан елге аман оралып, көз қуанышымыз болып жүрген ардагерлерге, жеңісті бір қадам жақындатқан тыл еңбек-керлеріне ризашылығын білдірді. Ауған соғысы ардагерлері ұйымының төрағасы Алмаз Тасанов көпшілікті мерекемен құттықтап, бейбіт күннің астындағы татту-тәтті ғұмыр үшін ҰОС ардагерлеріне, майдандастарына алғыс айтты.

Мереке соңы концерттік шараға ұласып, аудандық мәдениет үйінің өнерпаздары өнерлерін ортаға салды.

Айта кетейік, ауданымызға арнайы ат басын бұрған Алматы облысының әкімі Марат Сұлтанғазиев Алға ауылында тұратын ардагер Солтанбай Жарықбасовтың шаңырағына арнайы барып, сый-сияпаттарын табыстап, ақ батасын алды.

С.НҰРАДИН.