Зәулім үйді көрдің бе?!

Зәулім үйге ендің бе?!

Құлпыртқан кім сол үйді!

Соған көңіл бөлдің бе!..

...Әр бөлмеден шалқып нұр,

Жұртты өзіне тартып тұр – деп ақын А.Абдрахман жырлағандай, Шелек ауылында «Асан М Компания» ЖШС-нің құрылысшылары салған заманауи 60 пәтерлі бес қабатты жаңа үй мамыр айының мамыражай күні жұртты өзіне тартып, 60 отбасының баспаналы болу қуанышы аталып өтті.

Президент Қ.Тоқаев Қазақстан халқына арнаған Жолдауында: «Жыл сайын елімізде кем дегенде 6 млн шаршы метр жаңа үй пайдалануға беріліп отырылуы керек», – деген еді. Осыған байланысты арнайы бағдарлама бойынша Шелек ауылында да көп жылдан бері үй кезегінде тұрып, зарыға күткен 60 отбасы үйлі болып, қуаныш тойын тойлады. Алматы облысының ғана емес, бүкіл Қазақстан бойынша ең үлкен ауылдардың бірегейі болып саналатын Шелек ауылының тұрғындары жылдан жылға көбейіп келеді. 40 мыңға жуық тұрғыны бар ауыл қанатын кеңге жайып, көркеюде.

Ия, «Үйі бардың – күйі бар» демекші, осынау қуанышқа ортақтасып арнайы келген облыс әкімінің бірінші орынбасары Нұрлан Әбдірахым жұртшылықты бүгінгі баянды күндерімен құттықтап, сөз сөйледі. Жақында Есік қаласында да осындай 120 пәтерлі көпқабатты тұрғын үйдің ел игілігіне берілетінін, алдағы уақытта да осындай үйлер салынатынын айтып, жаңалығымен бөлісті. Одан соң аудан әкімі Алтай Досумбаев екеуі пәтердің кілтін өз иелеріне салтанатты түрде табыс етті. Қуанышқа жиналғандарға шашу шашылып, асқақтата ән шырқалды, ауыл ақсақалы Елеусіз Сұлтанғазиев бата берді. Жаңа үйдің лентасы қиылып, ішке енген қонақтар көпбалалы ана Антонина Киллерге және жетім өскен азаматша Әлима Сейілхановаға баспана көрімдігі ретінде теледидар сыйға тартты.

Анарбек БЕРДІБАЕВ.