«AMANAT» ПАРТИЯСЫ ЖЕҢІС КҮНІ ҚАРСАҢЫНДА АУДАНЫМЫЗДАҒЫ ҰЛЫ ОТАН СОҒЫСЫНЫҢ АРДАГЕРЛЕРІ МЕН ТЫЛ АРДАГЕРЛЕРІН ҚҰТТЫҚТАДЫ.

Жеңіс күніне орай, «AMANAT» партиясының «Ардагерлерді ардақтайық» жобасы аясында облыстық партия филиалының төрағасы Қуат Байғоджаев бастаған бір топ халық қалаулылары мен партияластар ҰОС ардагері Солтанбай Жарықбасов, тылда еңбек еткен Нурбек Новаров, Михаил Скумай сынды ардагерлердің шаңырағына бас сұқты. Есімі ел есінен кетпейтін ардақты ардагерлерге сый-сияпатын табыстап, құрмет көрсетті.

– Бүгінгі таңда облысымызда Ұлы Отан соғысына қатысқан санаулы ардагер қалды. Ендігі парызымыз – көзі тірісінде осы кісілерге барынша қамқорлық жасап, көмегімізді аямау. Сізге Ұлы Жеңіс пен бүгінгі бейбіт күндеріміз үшін алғыс айтамыз. Олардың өшпес ерлігі жаңарған заманмен бірге жаңғыра бермек. Біз сіздерге зор денсаулық, елімізге бейбіт өмір мен бақ-береке тілейміз. Еліміз өркендей берсін! – деді ардагерлерге құрмет көрсете барған облыстық партия филиалының төрағасы Қуат Байғоджаев.

Айта кетейік, соғыс ардагерлерінің жағдайы үнемі партия назарында. Тек мереке күні емес, аманаттықтар әрқашан ардагерлеріміздің жағдайын сұрап, көңіл бөліп келеді.

Е.АСЫЛ.